पोखरा । नेपाली फिल्म ‘चित्रा’ आगामी २७ पुसमा रिलिज हुने भएको छ । ५ वर्षदेखि फिल्ममा लगानी गर्दै आएका सन्तोष अधिकारीको मुख्य अभिनय रहेको यो फिल्मको यतिखेर छायांकन सकेर सम्पादन कार्य भइरहेको निर्माण पक्षले जनायो ।

‘आमा’, ‘घर’ लगायत फिल्मका निर्माता अधिकारी यो फिल्ममा भने कार्यकार निर्माता पनि हुन् । अभिनयमा रुची भएकाले पनि आफू पर्दामा आएको बुधबार आयोजित पत्रकार सम्मेलनमा उनले बताए । उनले एक्सन, ड्रामा र सामाजिक कथामा आधारित सिनेमा प्रत्येक घरको कथा भएको बताउँछन् ।

खासमा ‘चित्रा’ बाबुछोरीको कथा हो । पछिल्लो समय राजनीतिक विषयवस्तु नेपाली सिनेमामा हाबी भइरहँदा पारिवारिक विषयवस्तु समेटिएको यो फिल्म दर्शक पाउनेमा निर्माण पक्ष आशावादी छ ।

निर्देशक घनश्याम लामिछानेले ‘चित्रा’ चल्ने प्रमुख आधार भनेकै कन्टेन्ट भएको दाबी गरे । आफूले निर्देशन गरेका यसअघिका फिल्मभन्दा मेकिङ हिसाबले पनि ‘चित्रा’ फरक बनेको उनले उल्लेख गरे । सन्तोष अधिकारीको अभिनयलाई लामिछानेले तारिफ गरेका छन् ।

कास्कीको घाचोक र पोखरामा छायांकन गरिएको फिल्ममा अधिकारीसँगै मेनुका प्रधान, शुभेच्छा खड्का, अर्पण थापा, प्रमोद अग्रहरि, प्रकाश घिमिरे, अन्जना बराइली, सिम्रन खड्का, आयुशी ढकाल, विनोद पौडेल, कपिल शर्मा, कुमार गुरुङ, उज्ज्वल ढकाल, दीपेश गजुरेल लगायत कलाकारको अभिनय छ ।

आशीष थापामगर निर्माता रहेको यो फिल्मको कथा अजय अधिकारीले लेखेका हुन् । मनीष गौतमको पटकथा रहेको सिनेमामा राजनराज शिवाकोटीको संगीत छ भने स्वरमा उनलाई मिलन अमात्यले साथ दिएकी छिन् । फिलमको एक गीत ‘नगर है तानातान, नजरैको हानाहान’ सार्वजनिक भइसकेको छ । महेश पौडेलले छायाकन गरेको फिल्मको सम्पादन सन्देश शाहले गरेका छन् ।

सन्तोष अधिकारी फिल्म्सको ब्यानर एवं अस्याप इन्टरटेन्मेन्ट नेपाल र अस्ट्रेलियाको निर्माणमा तयार भएको सिनेमाको नेपालभरको वितरणको जिम्मा केदार पराजुलीले लिएका छन् । सिनेमाको अष्ट्रेलिया अधिकार अविनास रोकामगरलाई सुम्पिएको छ ।