पोखरा । पौडी खेल्ने क्रममा डुबेर पोखरामा एकै दिन २ जना बालकको ज्यान गएको छ । हर्पन खोला र फुस्रेखोलामा गरी २ छुट्टाछुट्टै घटनामा ती बालकले अकालमा ज्यान गुमाएका हुन् ।

पोखरा १८, खपौदीस्थित हर्पनखोलामा पौडी खेल्नेक्रममा स्याङ्जा स्थायी घर भई हाल पोखरा ५, मालेपाटन निवासी सोनम सुवेदीको ज्यान गएको हो । १५ वर्षीय साथी सञ्जय कार्कीसँगै उनी पौडी खेल्न गएका थिए ।

आइतबार दिउँसो सोनम डुबेको थाहा पाएपछि उद्धारका लागिएको प्रहरी टोलीले उनलाई दिउँसो २ बजेर २४ मिनेटमा मृत फेला पारेको जिल्ला प्रहरी कार्यालय कास्कीका प्रवक्ता एवं प्रहरी नायव उपरीक्षक वसन्त शर्माले बताए । पारिवारिक स्रोतका अनुसार सोनमले भर्खरैमात्रै अमरसिंह माविबाट एसइई परीक्षा दिई बसेका थिए ।

उता, पोखरा १७, पावरहाउस्थित फुस्रे खोलामा पौडी खेल्ने क्रममा १७ वर्षीय सुप्रिम पौडेलको ज्यान गएको हो । जनप्रिय मावि कक्षा १० अध्ययनरत उनी पोखरा नागढुंगा निवासी हुन् । सशस्त्र प्रहरीको कालिका गणबाट खटिएको विशेष विपद् उद्धार तथा गोताखोर विपद् टोलीले युवकको उद्धार गरेको थियो । दुवै शव गण्डकी अस्पतालमा पोस्टमार्टमका लागि पठाइएको छ ।