पोखरा । ‘रिटिङ रिटिङ नबजाउ बिनायो, बिनायोले मन मेरो छिनायो’ का गायक तथा गीतकार लक्ष्मीप्रसाद (एलपी) जोशीको ८८ वर्षको उमेरमा निधन भएको छ ।

बिहीबार झापाको विर्तामोडस्थित घरमा साँझको खाना खाएपछि उनी अकस्मात बेहोस भएका थिए । अस्पताल लैजानेक्रममा बाटोमै उनको निधन भएको परिवारले जनाएको छ । उनी लामो समयदेखि मधुमेह रोगबाट पीडित थिए । छोरा मिलन र परिवारका अन्य सदस्यका साथ दमक बस्दै आएका थिए । गुरूपूर्णिमाको दिनदेखि उनी बिरामी थिए ।

उनको वल्लो खोलो, पल्लो खोलो, निगालो घारीमा च्याखुरा नाच्यो, खिपीमा खिपी बिनायो बाजा लगायतका गीतहरू पनि चर्चित छन् । २०१३ सालमा रेडियो नेपालमा पहिलो गीत रेकर्ड गराएका उनले २०२२ देखि २०२९ सालसम्म रेडियो नेपालमा पोखराका जनकविकेशरी धर्मराज थापासँग पनि काम गरे ।

धनकुटा ६, बिचबजारमा जन्मिएका जोशीले आजीवन लोकसंस्कृतिको क्षेत्रमा योगदान पुर्‍याएका छन् । बाल्यकालदेखि नै गीतसंगीतमा चासो राख्ने उनले लोकगीत सम्राटको उपाधिसमेत पाइसकेका छन् ।

जोशी आफ्नो जीवनकालमा रंगकर्मी, चित्रकार तथा कोरियोग्राफर समेत बने । उनले ९ फिल्ममा काम गरे । ‘हिजो आज भोलि’ फिल्ममा उनी पहिलो नायिका भुवन चन्दसँग समेत काम गरेका थिए ।

उनले किराँत नृत्य राष्ट्रियस्तरमा चिनाउने कामसमेत गरे । महाकवि लक्ष्मीप्रसाद देवकोटाको महाकाव्य ‘मुनामदन’ को गीतिनाटक समेत उनले मञ्चन गरेका थिए । लोकसंस्कृतिको क्षेत्रमा नामी भएका उनले इन्डियन युनभिर्सिटीले डाक्टरको मानार्थ उपाधि समेत पाए।