स्याङ्जा।  स्याङ्जाको पुतलीबजार १३, कुलबाँधस्थित दियालो आधारभूत विद्यालयमा कम्युटर खरिदका लागि पूर्व विद्यार्थी वीरेन्द्रजंग केसीले नगद सहयोग प्रदान गरेका छन् । विद्यालयको ४८ औं वार्षिकोत्सव, अभिभावक दिवस एवं पुरस्कार वितरण समारोहका अवसरमा शुक्रबार विद्यालय परिसरमा आयोजित कार्यक्रममा केसीले उक्त रकम प्रदान गरेका हुन् ।

कार्यक्रमका प्रमुख अतिथिसमेत रहेका केसीले विद्यालयको शैक्षिकस्तर सुधारका लागि कम्प्युटर र प्रिन्टर खरिदका लागि ८१ हजार रुपैयाँ नगद प्रदान गरेका हुन् । उनले बर्सेनि २ जना गरिब तथा जेहेन्दार विद्यार्थीका लागि शैक्षिक सामग्री, झोला, ड्रेससहित सम्पूर्ण खर्च बेहोरिदिने प्रतिबद्धता जनाए । पुतलीबजार १४, सिरिन्डाँडा स्थायी घर भएका केसी हाल अस्ट्रेलिया बस्दै आएका छन् ।

वडा सदस्य शारदा नेपालीको अध्यक्षतामा भएको कार्यक्रममा वार्षिक परीक्षामा उत्कृष्ठ विद्यार्थीहरुलाई पुरस्कार प्रदान गरिएको प्रधानाध्यापक हरिप्रसाद कोइरालाले बताए । उक्त अवसरमा ज्येष्ठ नागरिक एवं समाजसेवी कमलकान्त कोइराला उपस्थित थिए । शिक्षिका गीतादेवी लामिछानेले स्वागत गरेको कार्यक्रममा कक्षा ५ विद्यार्थी अमान मियाँले विद्यार्थीका तर्फबाट भनाइ राखे । कक्षा ३ का छात्र शौभाग्य पौडेलले कविता वाचन गरे । विद्यालयको पूर्व शिक्षिका समेत रहेकी वडा सदस्य एवं कार्यक्रम अध्यक्ष शारदा नेपालीले अभिभावक, विद्यार्थी एवं शिक्षकको त्रिपक्षीय सहकार्यले शैक्षिकस्तर उकास्न सकिने भनाइ राखिन् । विद्यालयमा हाल कक्षा ५ सम्मको पढाइ हुन्छ । तत्कालीन समयमा शिक्षाको आवश्यकतालाई ख्याल गरी कोइराला परिवारको अग्रसरतामा उक्त विद्यालय स्थापना भएको हो ।