पोखरा । १२ कक्षा को प्रश्न पत्र आउट गरेको आरोपमा पक्राउ परेका ३ जनालाई कास्की जिल्ला अदालतले छोड्न आदेश दिएको छ । अदालतका न्यायाधीश हरिप्रसाद कोइरालाको इजलासले बुधबार ३ मध्ये दुई जनासँग धरौटी माग र एक जनालाई साधारण तारिखमा छाड्न आदेश गरेको हो ।

प्रश्नपत्र आउने गरेको आरोपमा पोखरा ११ फूलबारी बस्ने ३९ वर्षे नारायण बास्तोला र सोही ठाउँका ३७ वर्षेय रामचन्द्र बास्तोला वैशाख १७ गते पक्राउ परेका थिए । जिल्ला अदालतले उनीहरुसँग १०÷१० हजार धरौटी माग गरेको छ । पछि पक्राउ परेका पुजन बास्तोलालाई भने साधारण तारिखमा छाड्न आदेश दिएको छ । पूजनलाई प्रहरीले केही दिनअघि मात्र पक्राउ गरेको थियो । दुवै शिक्षक फूलबारीकै शिवशक्ति माध्यमिक विद्यालयमा अध्यापनरत छन् ।

वैशाख १६ गते आइतबार बिहान शिवशक्ति माध्यमिक विद्यालयमा सञ्चालन भइरहेको कक्षा १२ को सामाजिक शिक्षा विषयको प्रश्नपत्र विद्युतीय माध्यमबाट आउट गरेको आरोपमा उनीहरु पक्राउ परेका थिए । विद्यालयमा सञ्चालन भइरहेको प्रश्न पत्र परीक्षा अगावै आउट गरेको सूचना पाएपछि प्रहरीले उनीहरुलाई नियन्त्रणमा लिएको थियो ।