पोखरा । पोखरा ८ नागढुंगास्थित नेसनल क्रियसन एकेडेमीमा विद्यार्थीले निर्वाचनमार्फत् स्कुल क्याप्टेन, भाइस क्याप्टेन र प्रिफेक्टर चयन गरेका छन् । निर्वाचनमा विद्यालयमा कक्षा ३ देखि १० सम्म अध्ययनरत करिब ५ सय विद्यार्थीले मतदान गरेको विद्यालयका प्राचार्य ज्ञानेन्द्र थापाले जानकारी दिए ।

विद्यालय प्रशासक विक्रम थापाका अनुसार कक्षा १० का आरुष लामा क्याप्टेन र कक्षा ९ का सौगात तामाङ भाइस क्याप्टेन तथा १२ जना प्रिफेक्टर निर्वाचित भए ।
निर्वाचित क्याप्टेनलगायतलाई प्राचार्य ज्ञानेन्द्र थापाले प्रजातान्त्रिक अभ्यासबाट निर्वाचन गराउँदा विद्यार्थीले पनि नयाँ अनुभूति गर्न पाएको बताए । उनले प्रजातान्त्रिक अभ्यासले विद्यार्थीमा सामाजिक भावना अभिवृद्धि हुने विश्वास व्यक्त गरे ।

निर्वाचनका सबै प्रक्रिया अपनाइएका कारण विद्यार्थीले देशको राष्ट्रिय निर्वाचनको अनुभूति गर्न पाएका थिए ।