पोखरा । पोखरा महानगरपालिका वडा नं. ७ पूर्ण खोप सुनिश्चित वडा घोषणा गरिएको छ । मंगलबार प्रभातफेरीसहित पूर्ण खोप सुनिश्चितता वडा घोषणा गरिएको हो ।

स्वास्थ्य महाशाखा प्रमुख हेमप्रसाद आचार्यले वडाबाट नै पूर्ण खोपको सुनिश्चितता र दिगोपनाको घोषणा हुनुले राज्यका सबै सम्बन्धित निकायहरुलाई झक्झकाउने बताउँदै अन्य वडाहरु र पूरै देशमा यो सन्देश पुग्ने विश्वास व्यक्त गरेका थिए ।

पोखरा ७ का वडा अध्यक्ष राममोहन आचार्यले चालु आव भित्रको १० महिनाको अवधिमा १६ देखि ५९ महिनाका सबै बालबालिकाहरुले १३ प्रकारका खोपका मात्रा पूर्ण रुपले लगाएको बताए । साथै उनले जनचेतना फैलियो भनेर पञ्चे बाजा, भजन टोली सहितको प्रभातफेरीको कार्यक्रम पनि गरिएको बताए ।

घोषणा कार्यक्रम अगाडि वडाको आयोजनामा महिला स्वास्थ्य स्वयमसेवीहरु, जनप्रतिनिधिहरु, आमा समूह, टोलविकास संस्था, युवा क्लब लगायत वडामा सक्रिय संघसंस्थाका प्रतिनिधिहरुको उपस्थिति थियो ।