सरकारले देशमा आउन लागेको आर्थिक संकट हटाउने अभिप्रायले जेठ १ गतेदेखि लागु हुने गरी सरकारी कार्यालयहरु हप्ताको २ दिन बिदा गर्ने र १० वटा बिलासिताका वस्तुहरु आयातमा प्रतिबन्ध लगाउने घोषणा गरेको छ । सरकारले त्यसको साथै अरु केही कदम चाल्छ कि भनेर पनि सोचिएको थियो । तर अझैसम्म कुनै कदम चालेको छैन । सरकारको त्यत्तिमात्र प्रयासले आर्थिक संकट हटाउन सकिन्छ भन्नेमा विशेषज्ञहरु आश्वस्त छैनन् । केही अरु पनि कदम चाल्नुपर्नेमा विशेषज्ञहरुको जोड छ । तिनीहरुले सरकारको त्यो कदमलाई अधुरो कदम भन्ने गरेका छन् ।

सरकारले त्यो कदम चाल्नुको मुख्य २ कारण छन् । एक त आयात–निर्यातको व्यापार घाटा अत्यन्त बढ्दै गएको छ । दोस्रो विदेशी मुद्रा सञ्चित घट्दै गएकोले हो । व्यापार घाटा कम गर्नमा निश्चय नै केही वस्तुको आयातमा प्रतिबन्ध लगाउनु हो । तर त्यो मात्र उपाय होइन । हामीले निर्यात योग्य वस्तुहरुको उत्पादन बढाएर तथा तिनीहरुको निर्यात बढाएर पनि व्यापार घाटा कम गर्न सक्छौं । निर्यातयोग्य वस्तुहरुको उत्पादन बढाउनेतिर सरकारको ध्यान नै गएको छैन । सरकारले निर्यात बढाउनेलाई प्राथमिकता दिनु उचित हुन्छ । आयात घटाउँदा ती वस्तुको भाउ अकासिन सक्छ र चोर बाटोबाट तिनीहरु आउन सक्छन् । माग अनुसारको आपूर्ति नहुँदा स्वत त्यसको मूल्य चुलिन्छ । बजारमा महँगी बढ्दै गयो भयो, त्यही महँगी भोलिको समस्या बन्छ । यो व्यावहारिक कुरालाई सरकारले विशेष ख्याल गर्नुपर्दछ । यस्तो कुरामा सरकारले उद्योगी व्यापारीसँग सल्लाह परामर्श गर्नु उचित हुन्छ । तर यो सरकारले ती उद्योगी व्यापारीसँग कुनै सोधपुछ र सल्लाह गरेको पाइँदैन । यस्तोमा सबैै पक्षको राय सल्लाह लिनु उचित हुन्छ ।

व्यापार घाटा भएकोले विदेशी मुद्रा सञ्चिती घटेको हो । केही वस्तुहरुको आयातमा रोक लगाएर विदेशी मुद्राको सञ्चिती जोगाउन सकिन्छ,यो निश्चय नै हो । तर विदेशी मुद्रा कमाउने हाम्रो क्षेत्रलाई सक्रिय पारेर पनि विदेशी मुद्रा आर्जन गर्न सकिन्छ । यो क्षेत्रमा पनि सरकारको ध्यान गएको देखिएन । सरकारले यस सम्बन्धमा के गर्दा कसरी छिटो विदेशी मुद्रा भिœयाउन सकिन्छ भन्ने सम्बन्धमा पर्यटन व्यवसायीसँग राय सल्लाह लिन सक्दछ । देशमा ठूलो आर्थिक संकट आउनसक्ने सम्भावना बढेको छ, सरकारले भने आफू एक्लैले त्यसको समाधान गर्न सकिन्छ भनेर अघि बढिरहेको छ । यो गलत हुनसक्छ । सरकारले सबै पक्षसँग राय सल्लाह लिनु पर्दछ । भोलि संकट आएपछि त्यसको परिणाम नराम्रो हुन सक्दछ । आर्थिक संकट भनेको सबैसँग सम्बन्धित संकट हो । त्यसमा सबैले सहयोग गर्नुपर्छ र सरकारले पनि सबैको सहयोग लिनु पर्दछ । हाम्रो विचारमा निर्यात योग्य वस्तुहरको उत्पादन बढाएर र उता विदेशी मुद्रा आर्जन गर्ने क्षेत्रमा पनि अभियानकै रुप दिएर प्रयास गर्नु बाञ्छनीय देखिन्छ ।