पोखरा । महेन्द्रपुल युथ क्लब आयोजनामा पहिलो पटक यु–२३ खुला बास्केटबल प्रतियोगिता सुरु भएको छ ।

पोखरा रंगशालास्थित बास्केटबल कोर्टमा फाइभ वाई फाइभ बास्केटल प्रतियोगिता आयोजना गरेको हो । प्रतियोगिताको पहिलो दिन दुई क्वाटरफाइनलका खेलसहित ७ खेल भएका हुन् ।

पहिलो क्वाटरफाइनलमा समूह वि मा रहेको अर्चलबोले हरिनाशलाई ५३–४१ को स्कोरमा पाखा लगाउँदै सेमिफाइनलमा प्रवेश गरेको छ । यस्तै समूह ए तर्फ पर्वतले अर्घौ पुन मगर समाजलाई ५९–३८ को स्कोरमा हराउँदै सेमिफाइनलको यात्रा तय गरेको हो । त्यसअघि भएको प्रिक्वाटरफाइनल खेलमा पहिलो खेलमा अर्चलबोटले गलेश्वरलाई ५१–३७ र पर्वतले घोरेपानीलाई ५६–५० ले हराएको थियो ।

अन्य प्रिक्वाटरफाइनलमा आयोजक महेन्द्रपुल क्लबले गगनगौंडालाई ४९–४२, केविए सेतोले सिक्लेसलाई ५५–३०, पिप्ले बास्केटबल क्लबले केविए कालोलाई ६०–२८ को स्कोरले हराउँदै क्वाटरफाइनलमा प्रवेश गरेका छन् । प्रतियोगिताको बाँकी क्वाटरफाइनलका खेलसँगै सेमिफाइनल र फाइलन शनिबार हुनेछ ।
प्रतियोगिता उद्घाटन गर्दै पोखरा महानगरपालिकाका उपप्रमुख मञ्जुदेवी गुरुङले महेन्द्रपुल युवा क्लबले स्थापनाकालदेखि नै विभिन्न सामाजिक काम गर्दै आइरहदा अहिले आएर खेलकुद कार्यक्रमको आयोजना गरेकोमा धन्यवाद दिइन् ।

आयोजक क्लब अध्यक्ष आनन्दकुमार तझ्याको अध्यक्षतामा भएको कार्यक्रममा उपाध्यक्ष बिकल शाहीले स्वागत मन्तव्य व्यक्त गरेका थिए । बास्केटवल संघका केन्द्रीय उपाध्यक्ष जुमकाजी गुरुङ, पोखरा उद्योग वाणिज्य संघका अध्यक्ष पवन प्रजापति लगायतले बोलेका थिए । कार्यक्रम सञ्चालन क्लब सचिव राजु कायस्थले गरेका थिए ।
१३ टिमले भाग लिएको प्रतियोगिताका विजेताले ४० हजार र उपविजेताले २५ हजार साथमा ट्रफी, मेडल र प्रमाणपत्र प्राप्त गर्नेछन् । प्रतियोगितामा हाइस्कोरर र मस्ट भ्यालुयबल प्लेयरले ट्रफी र प्रमाणपत्र प्राप्त गर्ने प्रतियोगिता संयोजक सेजल जोजीजुले बताए ।