चिसाखोला वेद विद्याश्रमको रजत स्मारिका लोकार्पण

आदर्श समाज सम्वाददाता
वैशाख २८, २०८१
Chisakhola news

पोखरा । पोखरा चिसाखोला वेद विद्याश्रम पोखरा–१८, चिसाखोला आश्रम कास्कीको औपचारिक स्थापनाको २५ वर्ष पुगेको अवसरमा हालसम्म भएका गतिविधि समेटेर प्रकाशन गरेको रजत स्मारिका २०८० स्वामी निशेषानन्द, विन्ध्यवासिनी पीठाधीशले लोकार्पण गरेका छन् ।

कार्यक्रममा स्वामी निशेषानन्दले वैदिक संस्कार, संस्कृतिको जगेर्नामा वेद विद्याश्रमको योगदानको प्रशंसा गर्दै चिसाखोला विद्याश्रममा आउँदा गुरुकुलीय वातावरणले आनन्द अनुभूति हुने बताए ।

ज्योतिष शिरोमणि प्राडा बलराम उपाध्याय रेग्मीले स्मारिकाले आर्थिक पारदर्शिता देखाउने भन्दै सबैलाई वेदको रक्षामा लाग्न आग्रह गरे । वेद विद्याश्रमका प्रमुख संरक्षक एवं संस्थापक अध्यक्ष मोक्षनाथ तिमिल्सिनाले विद्याश्रमको औपचारिक स्थापनादेखि हालसम्म दान दिने दाता, सहयोग गर्ने महानुभावलाई धन्यवाद् व्यक्त गरे ।

सोही अवसरमा ५ लाखभन्दा माथि अक्षयकोष दानदिने दातालाई मानार्थ प्रमुख संरक्षक, १ लाखभन्दा माथि अक्षयकोष दान दिने दातालाई मानार्थ संरक्षक र ५० हजारभन्दा माथि अक्षयकोष दान दिने दातालाई मानार्थ आजीवन सदस्यको प्रमाण पत्रद्वारा सम्मान गरियो ।

विद्याश्रमले स्थापनाकालदेखि सक्रिय सहयोग गर्ने २० जना महानुभावलाई सम्मानपत्र, दोसल्ला र करुवा सहित सम्मान, रजत कार्यक्रम अन्तर्गत प्रदेश व्यापी खुल्ला छन्दोबद्ध कविता प्रतियोगितामा प्रथम हुने संयोग बस्याल, द्वितीय हुने निकेश गिरी, तृतीय हुने नवराज अधिकारी र सान्त्वना हुने सुशिला पौडेल पहारीलाई क्रमशः ११ हजार, ८ हजार, ५ हजार र ३ हजार नगदसहित प्रमाणपत्र र दोसल्लाद्वारा पुरस्कृत गरियो ।

पोखरा चिसाखोला वेद विद्याश्रमको प्रांगणमा भएको कार्यक्रमा चर्चित कविता वाचक शिव त्रिपाठीले कविता वाचन, झपटबहादुर थापा, केशवप्रसाद अम्गाईँ लगायतले मन्तव्य राखेका थिए । विद्याश्रम कार्य समिति अध्यक्ष मणिरत्न अधिकारीको अध्यक्षतामा भएको कार्यक्रमको स्वागत मन्तव्य विव्यस अध्यक्ष गोपाल तिमिल्सिना र सञ्चालन सचिव गंगासागर उपाध्यायले गरेका थिए ।

Related News

सम्बन्धित समाचार

hero news full width

trending post

ट्रेन्डिङ्ग