अनुपम म्युजिकद्वारा १० हजारभन्दा बढीलाई तालिम

आदर्श समाज सम्वाददाता
असार १, २०८१
Anupam

पोखरा । अनुपम म्यूजिक पोखराले २०२ औं शृङ्खलाको उद्घोषण तथा भाषणकला तालिम सम्पन्न गरेको छ ।

शनिबार पोखरामा आयोजित समापन समारोहमा पोखरा ४ का वडाध्यक्ष देवकृष्ण पराजुलीले सहभागीलाई प्रमाणपत्र वितरण गरे । जीवनको अनिवार्य सिपका रूपमा भाषणकलाको चर्चा गर्दै उनले यस्तो सिप सबै वर्ग र क्षेत्रका मानिसले सिक्नुपर्नेमा जोड दिए ।

अनुपम म्यूजिकले २० वर्षदेखि सञ्चालन गर्दै आएको तालिमबाट उच्च पदस्थ नेतासम्म लाभान्वित भएको भन्दै पराजुलीले यो अभियानको प्रशंसा गरे ।

अनुपम म्यूजिकका संरक्षक वीरेन्द्र पालिखेको अध्यक्षतामा भएको कार्यक्रममा संस्थाका बन्ध निर्देशक अनुराग अधिकारीले अनुपम म्यूजिकबाट हालसम्म १० हजारभन्दा बढी व्यक्तिले तालिम लिइसकेको बताए । उनले अनुपममा एक पटक पैसा तिरेर तालिम लिएपछि जति पटक पनि निशुल्क तालिम लिन सकिने बताए ।

कार्यक्रममा गुरुङ चलचित्रका महानायक ताराबहादुर गुरुङ, ¥यान्डम रिडर्स सोसाइटी अध्यक्ष रुपिन्द्र प्रभावी, समाजसेवी राजकुमार घिमिरे, प्रशिक्षार्थी अनुपमा अधिकारी, मिलन बराल, अर्नभ तुलाचन, ओजस्वी गौतमलगायतले बोलेका थिए । कार्यक्रम सञ्चालन प्रशिक्षार्थीद्वय श्रेया अधिकारी र एलिसा थापाले गरेका थिए । सो अवसरमा गायिका कृषिका घिमिरेले गायन प्रस्तुत गरेकी थिइन् । तालिममा अनुराग अधिकारी, रुपिन्द्र प्रभावीलगायतले प्रशिक्षण दिएका थिए ।

Related News

सम्बन्धित समाचार

hero news full width