पोखरा, १५ माघ :  रेस्टुरेन्ट तथा बारहरुमा ग्राहकहरुबाट लिइने सेवा शुल्क काठमाडौं, पोखरा र चितवनको सौराहामा हटाइएको छ ।

रेस्टुरेन्ट तथा बार एसोसिएसन नेपाल रेबान (काठमाडौं, पोखरा र सौराहा)को सोमबार काठमाडौंमा भएको भेलाले ग्राहकहरुबाट लिइने १० प्रतिशत शुल्क हटाउने निर्णय गरेको हो ।

ग्राहकबाट सेवा शुल्कको नाममा अतिरिक्त १० प्रतिशतसमेत जोडेर रकम लिन थालिएपछि चौतर्फी विरोध भएको थियो ।

उपभोक्ता हित तथा अनुरोधलाई ध्यानमा राखी माग १५ गते मंगलवारको मितिदेखि क्रमिकरुपमा लागू हुने गरी सेवा शुल्क हटाउने निर्णय गरिएको रेबानद्वारा जारी प्रेस विज्ञप्तिमा लेखिएको छ, । मंगलवारको निर्णयसँगै काठमाडौं, पोखरा र सौराहाका बार तथा रेस्टुरेन्टमा सेवा प्रयोग गरेबापत कुनै सेवा शुल्क लिइने छैन ।

सोमबार आयोजित भेलाको निर्णयबारे जानकारी दिन प्रकाशित प्रेस विज्ञप्तिमा केन्द्रीय रेबानका अध्यक्ष प्रमोद कुमार जैसवाल र रेबान पोखराका अध्यक्ष भिमसेन भुजेलको पनि हस्ताक्षर छ । रेबान सौराहाका अध्यक्ष गोकर्ण गिरीले भने प्रेस विज्ञप्तिमा हस्ताक्षर छैन ।