पोखरा । पशु स्वास्थ्य तथा पशु सेवा परिषद् ऐन र यसका प्रावधानका बारेमा पशु स्वास्थ्य तथा पशु सेवा क्षेत्रमा काम गर्ने प्राविधिक एवं व्यवसायीलाई अभिमुखीकरण गरिएको छ । पशु स्वास्थ्य तथा पशु सेवा परिषद्को कार्यालयले पोखरामा गरेको कार्यक्रममा १ सय ५० भन्दा बढीको सहभागिता थियो ।

परिषदका अनुसार पशु स्वास्थ्य तथा पशु सेवा परिषद् ऐन पारित भएपछि पशु स्वास्थ्य तथा पशु सेवा क्षेत्रमा काम गर्ने प्राविधिक एवं व्यवसायी कानुनतः काम गर्न सुरक्षित भएका छन् । परिषद् ऐन पारित भएपछि सो क्षेत्रमा काम गर्ने प्राविधिकले कानुनी रूपमा मान्यता पाएका छन् । यसअगाडि सो क्षेत्रमा काम गर्दै आए पनि कुनै पशुधनको हानी नोक्सानी भएमा क्षतिपूर्तिसहित सजायको भागीदार हुने व्यवस्था रहेको थियो । सरकारले नेपाल पशु स्वास्थ्य तथा पशु सेवा व्यवसायी परिषद् ऐन २०७९ हालै पारित गरेपछि पशुपन्छी क्षेत्रका प्राविधिकको नियामक निकाय गठनको बाटो खुलेको हो ।

अब यस क्षेत्रमा काम गर्ने सबै प्राविधिक यसै परिषद्को मातहतमा रही काम गर्न पाउने भएका छन् । यसअगाडि भेटेरिनरी चिकित्सकलाई मात्र पशुपन्छीको स्वाथ्योपचारका लागि मान्यता दिइएको थियो । तर किसानको घर गोठमा पुगेर सेवा दिने पशु प्राविधिकको संख्या भने धेरै थियो । आफ्नो पेसा सुरक्षाका लागि परिषद्््को माग राख्दै आएको कुरा पूरा हुने दिशामा गएको परिषद् सदस्य सुरेशकुमार श्रेष्ठले बताए ।

झन्डै ८० हजार जनाले नेपालको पशु स्वास्थ्य क्षेत्रमा सेवा दिँदै आएको श्रेष्ठको दाबी छ । पारित सो परिषद्मा ग्रामीण पशु स्वास्थ्य कार्यकर्तादेखि यस क्षेत्रमा पिएचडी गरेका फिसरी, डेरीलगायत सरकारी एवं गैर सरकारी क्षेत्रमा काम गर्ने प्राविधिकले सदस्यता लिई काम गर्न पाउने छन् ।