पोखरा । लायन्स क्लब अन्तर्राष्ट्रिय डिस्ट्रिक्ट ३२५ एल नेपालका सदस्यहरुलाई मनिपाल मेडिकल कलेज शिक्षण अस्पतालमा उपचार लगायत सेवामा विशेष छुट हुने भएको छ ।

यसबारेमा मनिपाल र लायन्सबीच बिहीबार सम्झौता भएको छ । उक्त डिस्ट्रिक्टका सदस्यलाई अस्पतालबाट प्रदान हुने सेवामा १० देखि सय प्रतिशतसम्म छुट हुनेछ ।

डिस्ट्रिक्ट गभर्नर परमेश्वर बराल र मनिपाल अस्पतालका प्रमुख कार्यकारी अधिकृत अनिल ओडुविलबीच समझदारी पत्रमा हस्ताक्षर भएको छ ।

गभर्नर बरालका अनुसार बिरामी दर्ता र चिकित्सक परामर्शमा पूरै छुट हुनेछ भने बेड भर्नामा २५ र बिरामी परीक्षणमा १५ प्रतिशत छुट हुने छ ।

सम्झौताका लागि डिस्ट्रिक्ट एडमिनिस्ट्रेटर कृष्ण आचार्य र अस्पतालका सम्पर्क अधिकृत कृष्णमोहन श्रेष्ठले सहजीकरण गरेका थिए । अस्पतालमा ती सुविधा लिन लायन्स सदस्यले डिस्ट्रिक्टको सिफारिस लैजानुपर्ने छ ।