पोखरा । डाँका चोरी तथा लागु औषधमा १३ वटा मुद्दा चलिरहेका एक आरोपित पोखराबाट बिहीबार अटोमेटिक पेस्तालसहित पक्राउ परेका छन् ।

पोखरा– १८, सराङकोटका ३८ वर्षीय नरबहादुर विकलाई लेकसाइडबाट वडा प्रहरी कार्यालय बैदामको टोलीले पक्राउ गरेको हो ।

लेकसाइडस्थित दीपक गिरीको बन्दै गरेको घरमा विकको साथबाट प्रहरीले ९ एमएमको अटोमेटिक पेस्तोल र त्यसमा लाग्ने १ राउन्ड गोलीसमेत बरामद गरेको छ । साथै बागमती प्रदेश ०३३प१६३३ नम्बरको मोटरसाइकल पनि प्रहरीले नियन्त्रणमा लिएको छ । राजु नेकेट नामले परिचित उनीविरुद्ध यसअघि १३ वटा मुद्दा चलेको प्रहरीले जनाएको छ ।

उनीविरुद्ध ९ चैत २०६२ मा सार्वजनिक अपराधको मुद्दा चलेको थियो । २६ चैत २०६५ मा पनि कास्की प्रहरीबाटै सार्वजनिक अपराधको मुद्दा चलेको थियो । त्यस्तै १९ साउन २०६६ मा लागुऔषध, २६ चैत २०६६ मा सार्वजनिक अपराध, २ असार २०६७ मा चोरी, ६ असार २०६७ मा चोरीको मुद्दा चलेको पाइएको छ ।

६ भदौ २०६७ मा सार्वजनिक अपराध, ११ माघ २०७१ मा लागु औषध, ८ माघ २०७१ मा चोरी, १६ कात्तिक २०७७ मा अभद्र व्यवहार, २८ फागुन २०७७ मा अभद्र व्यवहार, ११ मंसिर २०७९ मा लागु औषध र २२ कात्तिक २०८० मा चोरी तथा डाँका कसुरको मुद्दा चलेको पाइएको छ ।