पोखरा । कास्कीमा माध्यमिक शिक्षा एसइईका उत्तरपुस्तिका परीक्षण रोकिएको छ । १० वर्षदेखि उत्तरपुस्तिका परीक्षण पारिश्रमिकमा वृद्धि नभएको भन्दै शिक्षकहरुले समयानुकूल पारिश्रमिक वृद्धिको माग गर्दै ध्यानाकर्षण पत्र पेस गरेर बुधबारदेखि परीक्षण रोकेका हुन् ।

उत्तरपुस्तिका परीक्षण तथा सम्परीक्षण आमकस्केली शिक्षक समूहका संयोजक छविराज पौडेलले शिक्षा विकास निर्देशनालय गण्डकी प्रदेश प्रमुख अम्बिका आचार्य र शिक्षा विकास तथा समन्वय एकाइ कास्की प्रमुख लोकनाथ आचार्यलाई विभिन्न मागसहितको ज्ञापनपत्र हस्तान्तरण गरेको संघर्षरत शिक्षक समूहका सूचना तथा सञ्चार संयोजक अमृत घिमिरेले बताए ।

निर्देशनालय प्रमुख अम्बिका आचार्यले शिक्षकहरुका माग जायज भएकाले केन्द्रसँग समन्वय गर्ने आश्वासन दिए । उनले परीक्षण नरोकिदिन आग्रह गर्दै आन्दोलनका कार्यक्रमसँगसँगै समयमै कापी परीक्षणलाई पनि जारी राखिदिन अनुरोध गरेका थिए ।

समन्वय एकाइ प्रमुख लोकनाथ आचार्यले माग सम्बोधन गर्न केन्द्रलाई अनुरोध गर्ने बताए । उनले कापी परीक्षणलाई निरन्तरता दिन आग्रह गरे ।

एक दशक बितिसक्दा समेत एउटै पारिश्रमिक दरमा कापी परीक्षण गराउनु आफूहरुका लागि अन्यायपूर्ण भएको भन्दै माग सम्बोधन नहुँदासम्म कापी परीक्षण र सम्परीक्षण स्थगित गर्नुपरेको संयोजक घिमिरेले बताए ।

ज्ञापनपत्रमा उत्तरपुस्तिका परीक्षण स्थगनले समयमै नतिजा प्रकाशनमा पर्नसक्ने असरप्रति आफूहरु गम्भीर रहेकाले सम्बन्धित निकाय र नेपाल सरकार नै जिम्मेवार हुने सामूहिक ठहर शिक्षकहरुले गरेका छन् । ज्ञापनपत्रमा परीक्षा सञ्चालन, केन्द्राध्यक्ष, निरीक्षक र उत्तरपुस्तिका परीक्षण शुल्क समयानुकूल पुनरावलोकन गर्नुपर्ने माग छ । पारिश्रमिक वृद्धि नहुँदासम्म शिक्षक शिक्षिका कापी परीक्षण सम्परीक्षणमा कुनै हालतमा नफर्कने शिक्षक भोजराज तिवारी बताउँछन् ।

यसपालि  १५ देखि २७ चैतसम्म भएको एसइईमा कास्कीमा १० हजार १ सय ७४ परीक्षार्थी थिए ।