पोखरा । पोखरा महानगरपालिका खेलकुद विकास समितिको आयोजना तथा महानगर क्रिकेट संघ पोखराको संयोजनमा शनिबारदेखि नगर स्तरीय टी–ट्वान्टी छात्रा क्रिकेट प्रतियोगिता सुरु भएको छ । पोखरा रंगशालामा भएको प्रतियोगिताको उद्घाटन खेलमा सिद्ध माविले भद्रकाली माविलाई ४३ रनले पराजित ग¥यो । पहिला ब्याटिङ गरेको सिद्धले रचना चौधरीको अभिजित ४४ तथा सुशीला दिमदुङको अभिजित १० रनको मद्दतमा २० ओभरमा ३ विकेट गुमाएर १ सय २१ रन बनाएको थियो ।

प्रत्युत्तरमा भद्रकालीको पारी ७८ रनमा समेटियो । उसले १३.२ ओभरमा सम्पूर्ण विकेट गुमाएको थियो । भद्रकालीलाई अल आउट गर्ने क्रममा प्लेयर अफ द म्याच समेत बनेकी रचना चौधरीले ५ विकेट लिइन् । त्यस्तै, सुशीला र अंकिता ठकुरीले समान २ तथा सुनिला रानामगरले १ विकेट लिइन् । भद्रकालीका लागि विशाखा महर्जनले १२ रन बनाइन् ।

यसअघि आयोजक समितिका सदस्य सचिव सुवास खड्काले एम्पायरलाई बल हस्तान्तरण तथा बलिङ र मुख्य प्रायोजक कंगारु एजुकेसन फाउन्डेसनका निर्देशक टिआरकाफ्लेले ब्याटिङ गर्दै प्रतियोगिताको सुरुआत गरेका थिए । प्रतियोगिता संयोजनकर्ता महानगर क्रिकेट समितिका अध्यक्ष वीरेन्द्र पुनको अध्यक्षतामा भएको कार्यक्रम उपाध्यक्ष गोविन्द प्रधानले सञ्चालन गरेका थिए ।