पोखरा । पोखरामा पचासको दशकमा ब्यान्डहरुको जगजगी थियो । तर, अहिले समयक्रमअनुसार अधिकांश सुस्ताए । लामो समय सुस्ताएको पोखरेली ब्यान्ड पुनर्जागित गर्ने उद्देश्यले पोखरा सांगीतिक कलाकार संघले इन्टर कलेज ब्यान्ड कम्पिटिसन गर्दैछ । १२ र १३ असोजमा नयाँबजारस्थित प्रदर्शनी केन्द्रमा हुने प्रतियोगितामा २१ टिमले प्रतिस्पर्धा गर्दैछन् ।

संघले बुधबार पत्रकार सम्मेलन गरी प्रतियोगिताको आवश्यक तयारी पूरा भएको जनायो ।

प्रतियोगितामा १८ कलेजका २१ टिमले भाग लिएका हुन् । तीमध्ये भद्रकाली मावि, कालिका मावि, कुमुदिनी होम्स, इन्फोमेटिक्स कलेज, कान्तिपुर कलेज, ग्लोबल कलेजियट, सगरमाथा मावि, लाभेन्ज बोर्डिङ स्कुलले प्रतिस्पर्धाका लागि नाम दर्ता गराएको संघका अध्यक्ष हर्कराज गुरुङ (भाइ) ले बताए । त्यस्तै, प्रगति बोर्डिङ, प्रतिभा मावि, पोखरा एकेडेमी, न्यू ग्यालेक्सी, मदरल्यान्ड, न्यू डायमन्ड मावि, लिङ्कन कलेज र पश्चिमाञ्चल माविले पनि भाग लिएका छन् । प्रतिभा, प्रगति र न्यू डायमण्डले २/२ टिमले भाग लिएका छन् । कक्षा ८ देखि स्नातकोत्तरसम्मका विद्यार्थीले भाग लिन पाउने प्रतियोगितामा धेरैले फर्म भरे पनि डिजिटल अडिसन आधारमा २१ टिम छनोट गरिएको संघका सचिव भाष्करध्वज श्रेष्ठले बताए ।

प्रस्तुतिका आधारमा १० टिम फाइनल पुग्ने र तिनीहरुमध्ये प्रस्तुति आधारमा प्रथम, द्वितीय र तृतीय घोषणा गरिने छ ।

इन्टरकलेज ब्यान्ड कम्पिटिसनमा १८ कलेजका २१ टिमबीच प्रतिस्पर्धा

व्यान्डहरुले कभर सङमात्रै गाए पनि पुग्छ । प्रथमलाई १ लाख, दोस्रोलाई ५० हजार र तेस्रोलाई २५ हजारसहित प्रमाणपत्र प्रदान गरिने छ । प्रतियोगितामा उत्कृष्ट भोकल, लिड गिटार, रिदम गिटार, बेस गिटार र उत्कृष्ट ड्रमरलाई पनि नगद ५ हजारसहित पुरस्कृत गरिनेछ ।

पोखराको सांगीतिक माहोल तताउँदै व्यान्डहरुलाई पुन:जागृत गराउने उद्देश्यले इन्टरकलेज व्यान्ड कम्पिटिसन गर्न लागेको पोखरा सांगीतिक कलाकार संघले जनाएको छ । संघका अध्यक्ष हर्कराज गुरुङले प्रतियोगिताले विद्यार्थीमा लुकेर रहेका प्रतिभाको उजागर गर्नुका साथै विद्यालयमा सांगीतिक माहोल सिर्जना गर्नका लागि वातावरण बनाउने बताए ।

कार्यक्रममा स्वागत मन्तव्य व्यक्त गर्दै संघका सहसचिव विनोद बानियाले शिक्षा र संगीतलाई जोड्ने प्रयास आफूहरुले गरेको बताए । ‘कुनै बेला पोखरा सांगीतिक व्यान्डको सहरको परिचय बनाएको थियो,’ बानियाले भने, ‘अहिले त्यो अवस्था शून्यतामा छ । फेरि उठाउने प्रयास गरिएको छ ।’

प्याब्सन कास्की अध्यक्ष मधुराप्रसाद पौडेलले कलाकार संघले शिक्षा र संगीतलाई जोड्ने प्रयास सह्रानीय भएको बताए । यो कार्यक्रम गर्न सधैं सहयोग गर्ने बताए ।