मुस्ताङ ।  मुस्ताङको वारागुङ मुक्तिक्षेत्र गाउँपालिका ५ फल्याकमा उद्घोषण तथा नेतृत्व विकास तालिम भएको छ ।

गाउँपालिकाको महिला, बालबालिका तथा ज्येष्ठ नागरिक शाखाद्वारा महिलाहरुको सशक्तीकरण लागि ४ दिनसम्म सो तालिमको आयोजना गरिएको शाखा प्रमुख ललिता पौडेलले बताइन् ।

कार्यक्रममा गाउँपालिका अध्यक्ष रिङजिन नाम्गेल गुरुङले महिलाहरुलाई अगाडि बढाउन यो तालिम निकै प्रभावकारी भएको बताए ।

गाउँपालिकाका प्रमुख प्रशासकीय अधिकृत जितबहादुर रानाले मुस्ताङका महिलाहरुले चुलोचौका छाडेर तालिममा सहभागी भई निर्धक्क भएर बोलेको देख्दा खुसी लागेको बताए । सञ्चारकर्मी गोविन्द थापा सिञ्जालीले सहजीकरण गरेको तालिममा वडा ५ अन्तर्गत फल्याक र ढाकरझोङका ३० जना महिलाहरुले भाग लिएका थिए । तालिम गाउँपालिका उपाध्यक्ष दिकी गुरुङको अध्यक्षतामा भएको हो ।