पोखरा । नेपाली कांग्रेसका नेता एवं प्रजातन्त्रका सेनानी हीरामणि सुवेदीको शनिबार निधन भएको छ । ८९ वर्षे सुवेदी फोक्सो र मुटुसम्बन्धी समस्याबाट ग्रसित थिए ।

नेपाली कांग्रेस कास्की उपसभापति भइसकेका उनी नेपाल किसान संघको केन्द्रीय सदस्यसमेत थिए । सभापति शुक्रराज शर्मा सभापति हुँदा सुवेदी जिल्ला उपसभापति थिए ।

मुलुकमा प्रजातन्त्र स्थापना र पार्टीको सुदृढीकरणमा लागेकै कारण उनी पटकपटक जेल परेका थिए । २०१७ सालमा उनीसहित कास्कीका नेता तथा कार्यकर्तालाई तत्कालीन सरकारले झुटा मुद्दा लगाएर जेल हालेको थियो । नारायणदत्त रानाभाट, चूडामणि लामिछाने, भोजराज भण्डारी, भोजराज सुवेदीलगायत कांग्रेस नेतालाई टेलिफोन चोरीको आरोप लगाएर जेल चलान गरिएको थियो । २०४२ सालको सत्याग्रह, २०४६ सालको जनआन्दोलनमा पनि सुवेदीले जेल परेका थिए ।

राजनीतिसँगै शैक्षिक र धार्मिक विकासमा समेत उनी निरन्तर क्रियाशील थिए । सुवेदीसमेतको अगुवाइमा लक्ष्मी मावि, लक्ष्मी आदर्श मावि लगायत शैक्षिक संस्थाहरू स्थापना भएका थिए । रेडक्रसलगायत सामाजिक संस्थामा समेत उनी आबद्ध थिए ।

सुवेदीका २ पत्नीमध्ये थिए । १ पत्नीको २० दिन अगाडिमात्र निधन भएको थियो । सुवेदीका २ छोरा राजनमणि र ऋषिमणि तथा ६ छोरी छन् । उनको अन्त्येष्टि आइतबार गरिएको छ ।