पोखरा ।  पोखरा–११, रानीपौवास्थित सयपत्री सहकारी संस्थाले गण्डकी प्रदेश सहकारी रजिस्ट्रार कार्यालयका रजिस्ट्रार र शाखा अधिकृतको उपस्थितिमा अन्तक्र्रिया र प्रशिक्षण भएको छ । संस्थाका सञ्चालक समिति, लेखा समिति, सल्लाहकार, कर्जा उपसमिति, शिक्षा उपसमिति र कर्मचारीबीच सहकारी को अवस्था र चुनौतीबारे अन्तक्र्रिया र प्रशिक्षण गरेको हो ।

सहकारी रजिस्ट्रार रमेश धर्तीले हाल आर्थिक संकटका कारणले बैंक तथा वित्तीय संस्थालाई मात्र नभई समग्र अर्थतन्त्रलाई असर पारेको बताए । चुनौतीमात्र हैन यो अवसर पनि हो भन्दै उनले असल र सक्षम सहकारीले यसलाई अवसरका रुपमा लिनुपर्नेमा जोड दिए ।

सहकारी आफ्नै सदस्यहरुबाट मात्र सञ्चालन हुने भएकाले संस्थाका लिडरहरुले सहकारीका विषयमा सदस्यलाई सुसुचित गराई आफ्नै संस्थामा पूर्ण विश्वास दिलाई कारोबार गराउने गरेमा संस्थाहरु कहिल्यै पनि अप्ठ्यारोमा नपर्ने उनको भनाइ थियो ।

रजिस्ट्रार कार्यालयका शाखा प्रमुख चोलाकान्त वाग्लेले संस्था सञ्चालन गर्दा सर्वप्रथम सहकारी ऐन र सोमा बनेका नियमावलाीहरु राम्रोसँग अध्ययन गर्न सबैमा आग्रह गरे । संस्थाका सहसचिव जनार्दन बाँस्तोलाको संयोजकत्वमा भएको कार्यक्रम माघ ६ र ७ गते धम्पुसमा भएको थियो ।

संस्थाका अध्यक्ष टीकाबहादुर कार्कीले अन्तक्र्रिया एवं प्रशिक्षण कार्यक्रमले संस्थालाई निकै लाभ पुगेको र कार्यक्रममा सुझाव तथा सल्लाहलाई आत्मात् गर्दै संस्थालाई अझै राम्रो बनाउँदै लाने र सदस्यमुखी सेवा र उत्पादनप्रतिको जोडमा आफू प्रतिबद्ध रहेको बताए ।

संस्था कोषाध्यक्ष रमेश शर्मा बाँस्तोलाले आर्थिक विवरण जानकारी गराएका थिए । बजारमा सहकारीको अवस्था र हुनुपर्ने सतर्कताका विषयमा भएको अन्तक्र्रिया र प्रशिक्षणबाट सहकारीकर्मी लाभांन्वित भएका संस्थाका प्रबन्धक विकास सुवेदीले जानकारी दिए । कास्कीमा कार्यक्रम सञ्चालन सचिव वसन्तराज कोइरालाले गरेका थिए ।