पोखरा । नेपाल व्यवस्थापन संघ गण्डकी प्रदेश समिति गठन गरिएको छ । संघका केन्द्रीय अध्यक्ष उपेन्द्रप्रसाद पौड्यालको अध्यक्षतामा शनिबार पोखरामा आयोजित कार्यक्रममा पृथ्वीनारायण क्याम्पसका प्राध्यापक डा. वीरबहादुर कार्कीको अध्यक्षतामा नयाँ समिति गठन भएको हो । नवगठित प्रदेश समितिको उपाध्यक्षमा देवीलाल शर्मा (पृथ्वीनारायण क्याम्पस), सचिवमा माधव बस्ताकोटी (शंकर पेपर वर्कस् प्रालि), कोषाध्यक्षमा सूर्य रोक्का (नबिल बैंक गण्डकी प्रदेश) चयन भएका हुन । त्यसैगरी सदस्यहरुमा दुर्गाप्रसाद हुमागाईं (सफल मिडिया हाउस प्रालि), गणेशबहादुर थापा (होटल स्नोल्यान्ड, लेकसाइड), प्रकाश रेग्मी (नेपाल टुरिजम एन्ड होटल म्यानेजमेन्ट कलेज) र सिए अमित थापा (हिमश्री फुड) चयन भएका निर्वाचन समितिका संयोजक दिलीप पौडेलले जानकारी दिए ।

गण्डकी विश्वविद्यालयका कुलपति डा. गणेशमान गुरुङको प्रमुख आतित्यतामा सम्पन्न कार्यक्रममा नेपाल व्यवस्थापन संघका अध्यक्ष उपेन्द्रप्रसाद पौड्याल, महासचिव मोहन ओझा, पूर्वकोषाध्यक्ष दिलिप पौडेलले संघले हालसम्म गरेका गतिविधि र आगामी कार्यक्रमका विषयमा प्रकाश पारेका थिए ।

कार्यक्रममा नेपाल उद्योग वाणिज्य महासंघका पूर्व अध्यक्ष आनन्दराज मुल्मी, नेपाल पत्रकार महासंघ कास्कीका अध्यक्ष विमला भण्डारी, चेम्बर अफ कमर्स गण्डकीका अध्यक्ष किसान सुनार, नवनियुक्त अध्यक्ष डा. बीरबहादुर कार्कीको, देविलाल शर्मा लगायतले बोलेका थिए ।