पोखरा । मुलुक कोरोनाको मारमा पर्दा अयरपानी भने धमाधम पाहुना भित्राइरहेको छ । कास्की र स्याङ्जाको सिमाक्षेत्र फेदीखोला गाउँपालिका १, मट्टिखानमा पर्दछ, अयरपानी गाउँ । गाउँ टेक्ने बित्तिकै पाहुनाको स्वागतमा गाउँलेहरु फूलमाला लिएर बस्छन् । यहाँ अघिल्लो वर्षदेखि सञ्चालित अयरपानी सामुदायिक होम स्टेको मीठो आतिथ्य, सत्कार, रहनसहन र यहाँको मनोरम दृश्यले यहाँ पुग्ने जोकोही पुलकित हुन्छन् ।
हुन पनि पोखरा बजारदेखि नजिकै रहेको अयरपानी पुगेपछि जोकोहीलाई तत्काल त्यो ठाउँ छोड्न मन लाग्दैन । निकै उचाइमा रहेको यो ठाउँबाट पोखरा बजार तल पारेर हेर्नुपर्छ । उत्तरमा मनोरम हिमश्रृंखला, चारैतिर हरियाली वन, गाउँले परिवेश, मीठामीठा परिकार, रहनसहन, परम्परा, शान्त र सौम्य यहाँका विशेषता हुन् । पछिल्लो समय आन्तरिक एवं बाह्य पर्यटकको गन्तव्य बन्दै गएको आयरपानीबाट २/३ किमी दूरीमा नुवाकोट दरबार, मट्टिखान भ्यू टावर, गोर्खा स्मारक पर्दछन् ।
अयरपानी सामुदायिक होम स्टेका सचिव राजकुमार गुरुङ भन्छन्, ‘कोरोना महामारी सुरु भएकै वर्षदेखि हामीहरुले होम स्टे सुरु गरेका हौं । बजार कोरोना महामारीका कारण लकडाउन र निषेधाज्ञामा हुँदा पाहुनाको स्वागतमा भ्याइनभ्याइ छ ।’
गाउँमा खासगरी गुरुङ, बाहुन, क्षेत्रीको बसोबास छ । पोहोर ८ घरदेखि सुरु गरेको होम स्टे अहिले १३ घरमा फैलिइसकेको छ । गाउँमा कुल ३६ घरधुरीले बिस्तारै होम स्टे अँगाल्ने तयारीमा छन् । होम स्टेका अध्यक्ष सपना गुरुङका अनुसार पाहुनाको आकर्षण बढेकोले अब केही समयमै १३ घरबाट बढाएर २२/२३ घरमा होम स्टे सुरु गरिने छ । होम स्टेका कारण आयआर्जनमा समेत वृद्धि भएको उनले बताइन् । पाहुनाको स्वागत तथा सत्कारमा खटिनु पर्दा आफूहरु व्यस्त हुने गरेको उनले बताइन् । उनले भनिन्, ‘एकपटक आएको मानिस फर्किफर्कि आउने छन् । भर्खरैमात्रै ७० जना मानिसको एक ग्रुपसमेत राखेकोले एकै पटक १ सय जना पाहुना आए पनि बन्दोबस्त गर्न सक्ने क्षमता छ ।’
अयरपानीका कुल ३६ घरधुरीमध्ये १३ घरमा हाल होम स्टे सञ्चालित छ
होम स्टे सचिव राजकुमार गुरुङ यसअघि पोखरामा होटल चलाउँथे । उनी लकडाउन कारण होटल व्यवसायबाट हात धोएर आफ्नै गाउँठाउँमा होम स्टे व्यवस्थापनमा खटिएका छन् । उनको अनुभवमा विगतमा गाउँ छोडेकाहरु पनि अहिले परिस्थितिका कारण गाउँमै फर्किएका छन् । यहाँ छोडेर पोखरा, काठमाडौं, युके, हङकङ जहाँ जहाँ गएको भए पनि आफ्नो गाउँ ठाउँलाई महत्व दिएको उनको बुझाइ छ । सहरबजार तथा विदेशमा गएर बसेकाहरुका सन्तान आफ्नो पुर्खा हुर्की बढेको गाउँको ‘रियल लाइफ’ जान्न एक रात भए पनि बसेर जाने गरेका छन् ।
होम स्टे आउनेहरुको लागि निकै सस्तो दररेट तोकिएको छ । १ हजार रुपैयाँको प्याकेजमा साँझ लोकल कुखुराको मासुसहित खाना, तीनपाने रक्सी, राति सुत्ने व्यवस्था, बिहान उठेपछि कोदो तथा गहूँका रोटीको नास्ता र बिहान भेज खाना दिइन्छ ।
यहाँबाट पूर्वतर्फ करिब ३ किमी दूरीमा पर्दछ, नुवाकोट दरबार । यो दरबारको पनि आफ्नै विशेषता छ । यो ठाउँ नै नेपालका साहहरुको उद्गमस्थल हो । पश्चिममा बन्दै गरेको गोर्खा स्मारक घुम्न आउनेहरुलाई यहाँ एक रात भए पनि बसाउन सके आयआर्जनमा सहयोग पुग्नेमा स्थानीय आशावादी छन् । मट्टिखान भ्यू टावर चढेपछि कास्कीसहित छिमेकी जिल्लाहरु सजिलै देख्न सकिन्छ । धौलागिरीदेखि गणेश हिमालसम्मको हिमालको मनोरम दृश्यले मन लोभ्याउँछ । घरपालुवा जनाबरमात्र नभई जंगली जनाबर पनि यहाँ भेटिन्छन् । लोप हुँदै गएको सोरठी, घाटु नाचमा गाउँलेसँग नाच्न पाउँदा थप मनोरञ्जनसमेत मिल्छ ।
Related News
सम्बन्धित समाचार
प्रदेशमा सञ्चालित आयोजनाहरुको प्रगति विवरण २ दिनभित्र पेस गर्न मुख्यमन्त्रीको निर्देशन
गण्डकी सरकारविरुद्ध सर्वोच्चमा कांग्रेसले दर्ता गरायो रिट, पेसी पर्सि
सुरु भयो ट्राफिक सप्ताह, मुख्यमन्त्रीले गरे उद्घाटन
गण्डकीका सभामुखको कदमबारे मिश्रित प्रतिक्रिया
मुख्यमन्त्री अधिकारीले रोजे पुरानै मन्त्री
hero news full width
मुख्य समाचार
ट्राफिक सप्ताहको ब्यानरमा प्रदेशका मन्त्रीको शपथ !
फडिन्द्रले इन्कार गर्दा माओवादीले दिन सकेन मन्त्री
वैशाख २४, २०८१गण्डकीमा एमालेका सीता सुन्दास र बेदबहादुरले लिए मन्त्रीको शपथ
वैशाख २४, २०८१सीतालाई सामाजिक. बेदबहादुरलाई खानेपानी मन्त्रालयको जिम्मा
वैशाख २४, २०८१सीता सुन्दास र बेदबहादुरलाई मन्त्री बनाउँदै खगराज
वैशाख २४, २०८१मन्त्रीमण्डल विस्तार गर्दै मुख्यमन्त्री अधिकारी, आजै साढे ४ मा शपथ
वैशाख २४, २०८१