पोखरा । जिल्ला सहकारी संघ कास्कीको अध्यक्षमा सवित्रा कोइराला विजयी भएकी छन् । शनिबार भएको अधिवेशनमा उनले अध्यक्षका २ जना प्रत्यासीलाई पछि पार्दै १ सय ९८ मत पाइन् । अध्यक्षका प्रत्यासी बलराम गौतमले ७८ मत प्राप्त गर्दा अर्का प्रत्यासी धर्म अर्यालले ३६ मतमा चित्त बुझाए ।

शनिबार भएको मतदानमा ३ सय ४० मतदातामध्ये ३ सय २२ जनाले भोट हालेका थिए । संघको वरिष्ठ उपाध्यक्षमा छविलाल लामिछानेले उमराज बास्तोलालाई १ सय ४१ मतान्तरले पछि पो । लामिछानेले २ सय २२ मत प्राप्त गर्दा बास्तोलाले ८१ मत ल्याए । महिला उपाध्यक्षमा अम्बिका गौतम १ सय ९४ मतसहित विजयी प्रतिस्पर्धी संगीता तिमिल्सिनाले १ सय १२ मत ल्याइन् ।

महासचिवमा दीपकराज बास्तोला निर्वाचित भए । उनले महासचिवका प्रत्यासी ठाकुर पोखरेललाई भारी मतले पराजित गरे । बास्तोलाले २ सय २७ मत पाएका थिए भने पोखरेलले ७९ । कोषाध्यक्षमा नवराज बरालले लक्ष्मण कोइरालालाई पराजित गरे । बरालले २ सय मत ल्याउँदा कोइरालाले १ सय ३ मत पाए ।

संघको राष्ट्रिय प्रतिनिधि पद भने निक्कै चर्चामा रह्यो । प्रदेशसभा सांसद प्रभा कोइराला नै चुनावी मैदानमा होमिएको कारण राष्ट्रिय प्रतिनिधि पदमा भएको निर्वाचनको महत्व बढेको थियो । उक्त पदको लागि भएको मतदानमा दीपकप्रसाद आचार्य विजयी भए । आचार्यले २ सय १४ मत प्राप्त गर्दा सांसद कोइरालाले ८६ मत मात्र प्राप्त गरिन् ।

महिला सदस्यमा कौशिला गुरुङ, चन्द्रकुमारी पराजुली, मैनादेवी रावत, विना लोहनी सदस्य विजयी भए । खुला सदस्यमा खेमबहादुर गुरुङ, धनराज पुरी निर्वाचित भए । विषयगत प्रतिनिधिमा आनन्द सुवेदी, लेखा सुपरीवेक्षण समिति संयोजकमा धर्मबहादुर गुरुङ, लेखा सदस्यहरुमा रमण पौडेल, विमला बस्नेत विजयी भए ।