वालिङ । वालिङ नगरपालिकाको न्यायिक समिति र मेलमिलापकर्ताबीच सिकाइ तथा अभ्यास आदानप्रदान गरिएको छ ।

द एसिया फाउण्डेशन नेपालको सहयोग, वालिङ नगरपालिकाको समन्वय र प्राकृतिक द्वन्द्ध रुपान्तरण केन्द्र नेपालको आयोजनामा सो आदानप्रदान गरिएको हो ।

न्यायिक समिति तथा १४ वटै वडामा रहेका मेलमिलाप केन्द्रका संयोजकहरु सहभागी भएको उक्त कार्यक्रममा न्यायका क्षेत्रमा वडा–वडाका असल अभ्यासहरु, समस्यालगायत विषयमा छलफल भएको थियो ।

नगर प्रमुख दिलीपप्रताप खाँणले वडा–वडामा स्थापना भएको मेलमिलाप केन्द्रमार्फत मेलमिलापकर्ताले फाटेका मनहरु सिलाउने गरी न्याय सम्पादन गर्न सुझाव दिए । ‘न्याय सम्पादन गर्नेक्रममा मन फटाल्ने गरी नभई फाटेका मन सिउने गरी न्याय सम्पादन गर्नतर्फ जोड दिनुहोस्,’ नगर प्रमुख खाँणले भने, ‘जसरी भए पनि सर्वमान्य हिसाबमा न्याय पाएको अनुभूतिहोस्, न्याय मर्न दिनुहुँदैन भन्ने कुरा ख्याल गर्नुपर्छ ।’

उपप्रमुख एवं न्यायिक समिति संयोजक कल्पना तिवारीले मेलमिलाप केन्द्रमार्फत हेर्न मिल्ने विवादमात्रै मिलापत्र गराउनुपर्नेमा जोड दिइन् । उनले मेलमिलाप केन्द्रलाई प्रभावकारी बनाउनका लागि आवश्यक तालिम तथा अध्ययन अवलोकन भ्रमणको व्यवस्थापन गर्ने प्रतिबद्धता जनाइन् ।

कार्यक्रममा प्रमुख प्रशासकीय अधिकृत जीवन ज्ञवाली, वडा १ का वडाध्यक्ष एवं नगर प्रवक्ता केदार काफ्ले, द एशिया फाउन्डेसनका गण्डकी प्रदेश संयोजक पूर्ण परियार, वालिङ नगरपालिका कानून शाखा प्रमुख नरबहादुर पौडेल, प्राकृतिक स्रोत द्वन्द्व रुपान्तरण केन्द्रका रमिला होमागार्इँ र इरादा पहारीलगायतले बोलेका थिए ।