सरकारले संघीय प्रतिनिधि सभा र प्रदेश सभाको निर्वाचनको लागि मंसिर ४ गते मिति घोषणा गरेको छ । सरकारको यो घोषणाका साथ देश अब चुनावको माहोलमा प्रवेश गरेको छ । राजनीतिक पार्टीहरुले केही समय पहिलेदेखि नै चुनावमा के कसरी जाने भनेर आपसी सल्लाह परामर्श गरिरहेका थिए भने अब त्यस काममा गति थपिएको छ । ठूलाबडा कहलिएका कुनै पनि पार्टी एक्लै चुनाव लड्ने मनस्थितिमा छैन । सत्तारुढ गठबन्धन गरी चुनाव लड्दा फाइदा भएको महसुस गरी अहिले पनि गठवन्धन गरी निर्वाचनमा जाने तयारी गरिरहेका छन् । प्रमुख प्रतिपक्ष एमाले बाहिर भन्दा आफूले कसैैसँग गठबन्धन नगर्ने भन्दा भन्दै पनि भित्रभित्र साना पार्टीहरुसँग तालमेल गर्ने मनस्थितिमा छ । त्यसले साना पार्टी को–को सँग तालमेल गर्र्दा फाइदा हुन्छ भनेर हिसाब गरिरहेका छन् ।

गत स्थानीय निर्वाचनमा सिट संख्याको हिसाबले सबभन्दा नोक्सान एमालेलाई भएको थियो । पहिलो त्यो पार्टी सबभन्दा ठूलोमा एक नम्बरमा थियो भने चुनाव पछि त्यो पार्टी दोस्रो नम्बरमा सीमित भएको छ । यस सम्बन्धमा बाहिर त्यसले जे जस्तो भने तापनि भित्र त्यसलाई सहनै मुस्किलको पीडा छ । त्यसले त्यो पीडा फेरि दोहो¥याउन चाहँदैन । तर को सँग कसरी मिल्ने भन्नेमा त्यो पार्टीमा विवाद छ । एमाले अध्यक्ष केपी शर्मा ओली अन्य कम्युनिस्ट पार्टीसँग सामान्यतया तालमेल गर्ने पक्षमा छैनन् भने अरु केही नेताहरु भने वाम तालमेल गर्नुपर्ने पक्षमा छन् । भित्र तालमेलको कुरा भइरहेको छ तर त्यो कुरा परिणाम दिने अवस्थामा पुग्न सकेको छैन । अध्यक्ष ओलीकै कारण दोस्रो तहका नेताहरु खुलेर तालमेलको कुरा गर्न सकिरहेका छैनन् ।

त्यसो भए तापनि चुनाव आयो कि कम्युनिस्ट एकताको कुरा चल्छ । कम्युनिस्ट कम्युनिस्ट एक हुनुपर्छ । एक हुन नसके तालमेल गरेर चुनावमा जानुपर्दछ । एक वाम एक ठाम भन्ने पनि गरिन्छ । तर सबै कम्युनिस्ट पार्टीहरुले आफूलाई सक्कली कम्युनिस्ट भन्ने गरिएपछि ती सबै एकता प्रयास बीचैमा तुहिने गरेको छ । सक्कली र नक्कलीको विवाद पेचिलो बन्दै गएको छ । बाहिरी शक्तिले पनि जुन ठूलो छ, त्यसलाई मात्र देख्ने भएकोले केही समस्या सिर्जना भएको महसुस गरिएको छ । नेपाली कांग्रेसभित्र त्यस्तो विवाद छैन । तर त्यो प्रजातान्त्रिक पार्टी भएकोले त्यसभित्रको आन्तिरिक विवाद कहिलेकाहीं हिमालजस्तै ठूलो भएर देखापर्छ । त्यस पार्टीमा अहिले गठबन्धनमा रहेका दलहरुसँग तालमेल गरी चुवाव लड्ने कुरामा सहमति छ तर आन्तरिक सिटको तालमेलमा के–कसरी सहमति हुन्छ, त्यो भने हेर्न बाँकी छ । आगमी १ सय दिन चुनावको माहोल तातिँदै जानेछ । पत्र पत्रिकाहरु र सञ्चारका साधनहरु चुनावको रंगमा रंगिनेछन् । त्यो जे भए पनि देशको लागि महत्वपूर्ण समय हो । यसलाई सबैले सकारात्मक किसिमले हेर्नुपर्दछ । चुनावमा असल नेतृत्वका लागि आम नागरिकले सुझबुझका साथ हेरिरहनु् आवश्यक छ ।