पोखरा । गायक दीपक बज्रचार्य र उनको ‘रिदम ब्यान्ड’ हाल क्वारेन्टाइनमा छन् । सरकारले देशभर लक–डाउनको घोषणा गरिरहँदा बज्राचार्यले भने फेसबुक लाइभमार्फत दर्शकहरुलाई मनोरञ्जन दिलाइरहेका छन् ।

यसैबीच, मनोरञ्जनसँगै उनले सामाजिक सञ्जालमार्फत कोरोनाबारे सचेत पनि गराइरहेका छन् । हालै बज्रचार्यले युट्युबमार्फत ‘लक–डाउन .., लक–डाउन’ बोलको नयाँ गीत सार्वजनिक गरेका छन् । जसमा उनले कोरोनाको संक्रमण कम गर्नको लागि विश्वभरी भइरहेको लक–डाउन र त्रासबारे वर्णन गरेका छन् ।

उनले आफ्नो फेसबुक पेजमा नयाँ गीत सार्वजनिक गर्दै उक्त गीत अहिलेको अवस्थासँग मिल्दो जुल्दो रहेको र लिरिक्स पनि तुरुन्तै रचना गरिएको उल्लेख गरेका छन् । दीपक बज्रचार्यको स्वर रहेको उक्त गीतको शब्द बिजेन्द्र बज्रचार्यले लेखेका हुन् ।

उनले लेखेका छन् ‘यो गीत बनाउनुको मुख्य हाम्रो उद्देश्य भनेको संसारको वर्तमान अवस्थालाई स्वीकार्नु र यस मार्फत सकारात्मक हुनु हो । संभव भएसम्म मनोरञ्जन गर्नु हो । लक–डाउनको अवस्था छिट्टै नियन्त्रणमा आउनेछ र त्यतिन्जेलसम्म सुरक्षितसँग घरमै बस्न सबैलाई आग्रह छ ।’