पोखरा, १ फागुन । पोखराको फिर्केमा रहेको पोखरा इन्जिनियरिङ कलेजमा टेक्निकल एक्स्पो सुरु भएको छ । विद्यार्थीहरुले विकास गरेका उत्कृष्ट प्रोजेक्टहरुको प्रदर्शनी गर्नका लागि सातौं संंस्करणको एक्स्पो आयोजना गरिएको हो ।

एक्स्पोलाई एक कार्यक्रमका बीच सम्बोधन गर्दै नास्टका पूर्व उपकुलपति जीवराज पोखरेलले विद्यार्थीलाई पछिल्लो प्रविधिसँग ज्ञात गराएर माटो सुहाउदो यान्त्रिक उत्पादनमा सक्रिय गराउनुपर्ने बताए । उनले एक्स्पोले विद्यार्थीलाई नयाँ प्रविधि उत्पादनमा सघाउने र सीप आदानप्रदान समेत हुने भएकोले यस्ता कार्यक्रमलाई प्रोत्साहन गर्नुपर्ने बताए ।

एक्पो २ दिनसम्म चल्ने छ । कलेजभित्रैका ३ वटा फ्याकल्टीमा अध्ययनरत विद्यार्थीहरुले बनाएका प्राविधिक बस्तुहरु प्रदर्शनीमा राखिएको छ । ४० भन्दा बढी स्टल रहेको कलेजले जनाएको छ । कलेज र स्वतन्त्र विद्यार्थी परिषद्को संयुक्त आयोजनामा एक्स्पो भएको हो । सिभिल, आर्किटेक्चर र कम्प्युटर इन्जिनियरिङ तर्फका विद्यार्थीबीच प्रतिश्पर्धा हुने र प्रत्येक फ्याकल्टीमा पहिलो हुनेले १० र दोेश्रो हुनेले ५ हजार पुरस्कार पाउने छन् । यस्तै, सोही अवसरमा इन्टर कलेज सफ्ट्वेयर कम्पिटिसन पनि भएको छ ।

कलेजका प्रिन्सिपल ई. लेखबहादुर गुरुङको अध्यक्षतामा भएको कार्यक्रमको सञ्चालन विद्यार्थी परिषदका सहसचिव समिप रानाभाट र सदस्य सरिना गौतमले गरेका थिए । कार्यक्रममा नेपाल इन्जिनियरिङ एशोसियसनका गण्डकी अध्यक्ष बाबुराम भण्डारी, शिक्षक रजनी श्रेष्ठ, विद्यार्थी रजी गुरुङ लगायतले बोलेका थिए ।