पोखरा । प्रदेशसभा नियमावली अनुसार सदनमा उठाइएका प्रश्नबारे सम्बन्धित मन्त्रीले ७ दिनभित्र जवाफ दिनुपर्ने नियम छ । गएको माघ १४ को बैठकमा प्रतिपक्षी दलका नेता कृष्णचन्द्र नेपाली सहित विभिन्न सांसदहरुले मुख्यमन्त्रीसँग समसामयिक विषयमा प्रश्न उठाएर जवाफ मागेका थिए । प्रश्न उठाएको साता दिन कटिसक्दा समेत मुख्यमन्त्रीले जवाफ नदिएको भन्दै प्रमुख प्रतिपक्षी दल नेपाली काँग्रेस र समाजवादी पार्टीले गण्डकी प्रदेशसभा बैठकमा अवरोध गरेका छन् ।
नौ दिनअघि संसद्मा विशेष समय लिएर नेपालीले सरकारले राजनीतिक आस्थाका आधारमा कर्मचारी सरुवा गरेको, आर्थिक अनुशासन भुलेर मुख्यमन्त्री कप फुटबल प्रतियोगितामा पैसा दिइएको लगायत प्रश्न उठाएका थिए । त्यसैको जवाफ माग्दै संसद्मा प्रतिपक्षीले अवरोध गरेपछि सत्तापक्ष र प्रतिपक्षबीच दोहोरी नै चल्यो ।
सत्तापक्षका सांसदहरुले मन्त्रीहरु काम विशेषले नियमित जवाफ दिन नसक्ने र त्यसमा अवरोध गर्नु उपयुक्त नहुने बताइरहँदा प्रतिपक्षी दल चाहीँ नीति र नियमभित्र बसेर मन्त्रीहरुले पनि जवाफ दिनुपर्ने अडानमा छन् । मुख्यमन्त्रीले जवाफ नदिएसम्म सदन अघि बढ्न नदिने प्रतिपक्षी सांसदहरुले बताए । केही समयअघि पनि भौतिक पूर्वाधार विकास मन्त्रीको जवाफ माग्दै सदन अवरुद्ध भएको थियो । मन्त्रीले जवाफ दिएपछि मात्रै नियमित रुपमा चलेको सदन पुनः रोकिएको छ । प्रदेशसभामा हालसम्म एउटै कुराले धेरै पटकसम्म सदन अवरोध भएको छ । संसद् शुरु भएकै केही महिनापछि पहिलो पटकको नियमापत्ति पनि मन्त्रीले जवाफ नदिएको विषयमा केन्द्रित थियो ।
कार्यसूचिमा नाम राखेर चुमान बन्दीपुर
बिहीबारको कार्यसूचिमा सामाजिक विकास मन्त्री र भौतिक पूर्वाधार विकास मन्त्री सहित आन्तरिक मामिला मन्त्री हरिबहादुर चुमानले जवाफ दिने तालिका थियो । कार्यसूचि अनुसार शून्य समय र विशेष समयमा सांसदहरुले आफ्नो धारणा राखे । त्यसपछि सामाजिक विकास मन्त्री नरदेवी पुन र भौतिक पूर्वाधार विकास मन्त्री रामशरण बस्नेतले आफ्नो मन्त्रालयसँग सम्बन्धित प्रश्नको जवाफ दिए । जवाफ दिने तेश्रो सूचिमा रहेका चुमान सदनमा उपस्थित भएनन् । उनी इञ्जिनियरिङ एशोसिएसनको कार्यक्रममा सहभागी हुन बन्दीपुर गएका थिए । तर चुमानले कार्यसूचिमा आफ्नो नाम नराख्न आग्रह गरेको प्रतिक्रिया दिए । ‘कोही नभए म बोल्छु भनेको थिएँ । दुईजना मन्त्रीले जवाफ दिएको थाहा पाएपछि मैले नाम हटाउन भनिसकेको हुँ । त्यै पनि हाजिर हुन्छु भनेर महेन्द्रपुल पुग्दा त संसद् अवरुद्ध भैसकेछ,’ उनले भने, ‘कार्यसूचिमा नाम टाँसिए पनि मेरो नाम हटिसकेको थियो ।’ उनले एजेण्डा फरक भएपनि गच्छदारको मुद्दामा संसद् अवरुद्ध गरेको आरोप लगाए ।
‘संघमा पनि अवरुद्ध भएको छ । त्यही इस्युमा नभएपनि सार कुरो त त्यही हो । रुप अलग भएपनि सार कुरो अवरुद्ध गर्ने हो । कुरो मिल्यो नि,’ उनले भने, ‘नत्र मन्त्रीले जवाफ दिएपछि अवरुद्ध गर्नुपर्ने कारण थिएन ।’ मन्त्री चुमानले सदनमा उठाइएका सबै प्रश्नको जवाफ दिनुपर्ने बाध्यता नरहेको बताए । ‘प्रश्न उठाएपछि जवाफ दिनैपर्ने भन्ने पनि हुँदैन । महत्वपूर्ण भए जवाफ दिने हो । संघ सरकारको बिषय उठेपछि त्यसमा जवाफ दिनुपर्ने छैन,’ उनी भन्छन्, ‘प्रदेशसभाका विषय भए जवाफ दिएकै छौं । मुख्यमन्त्रीले जवाफ दिनुपर्ने कुनै विषय नै छैन ।’
‘चौतारीमा भाषण गरेजस्तो होइन संसद्’
शून्य समय र विशेष समयको कार्यसूचि सकियो । दुईजना मन्त्रीले जवाफ दिए । त्यसपछि गण्डकी प्रदेश प्राविधिक शिक्षा व्यावसायिक तालिम प्रतिष्ठानसम्बन्धी विधेयकमाथि छलफल गराउने तयारी गर्दै थिए, सभामुख नेत्रनाथ अधिकारी । समाजवादी पार्टीका सांसद हरिशरण आचार्यले तुरुन्तै उठेर नियमापत्ति जनाए । मुख्यमन्त्रीले जवाफ नदिएसम्म सदन अघि नबढाउन सभामुखलाई आग्रह गरे । तर सभामुखले अर्को बैठकमा मुख्यमन्त्रीलाई उपस्थित गराउने भन्दै सदन अघि बढाउन लागे । काँग्रेस सांंसद मेखलाल श्रेष्ठले पनि नियमापत्ती जनाए । मुख्मन्त्रीको जवाफ खोज्दै उनले पनि सदन अघि नबढाउन सभामुखलाई आग्रह गरे । सभामुखले पुरानै जवाफ फर्काए । त्यसपछि काँग्रेस र समाजवादी पार्टीका सबै सांसद उठेर बैठकको विरोध गरे ।
सत्तापक्षीय सांसद आशा खनालले प्रतिपक्षीले गरेको व्यवहार संसद् नियमावली अनुसार नभएको भन्दै नियमापत्ति जनाइन् । उनले सभा सञ्चालन गर्न सभामुखलाई दबाब दिइन् । नेकपाका प्रमुख सचेतक मायानाथ अधिकारीले पनि सदन रोक्न नहुने भन्दै अर्को बैठकमा मुख्यमन्त्रीलाई उपस्थित गराएर सदन निरन्तर चलाउन सभामुखलाई दबाब सिर्जना गरे । सभामुखले उठेका विपक्षी सांसदलाई बस्न आग्रह गरे । काँग्रेस सांसद कुमार खड्काले नियमापत्ति जनाउँदै प्रतिपक्षी सांसद उठेपछि सदन चलाउन नमिल्ने बताए । त्यसपछि सत्तारुढ सांसद राजीव पहारी जुरुक्क उठेर आफ्ना कुरा राख्न थाले । उनले सभामुखकै शैलीमा विपक्षी दलका सांसदलाई संसद् अवरुद्ध नगर्न भने । ‘सबै विषयबस्तु एकैदिन राख्ने भन्ने त हुँदैन । मन्त्रीहरुले जवाफ दिइरहनुभएको छ । तिललाई पहाड बनाएर प्रतिपक्षी माननीयहरुले सामान्य कुरामा अवरोध गर्नु संसद्ीय परम्परा र नीतिविपरीत छ । यसले संसद्ीय गरिमा पनि घटाउँछ । व्यक्तिगत रुपमा विशेष अनुरोध गर्न चाहान्छु । संसदीय प्रतिष्ठा हाम्रो क्रियाकलापले बढाउने हो । त्यसमा ध्यान दिन आग्रह गर्दछु,’ उनले भने ।
त्यसपछि दोहोरी शुरु भयो । पहारीले १ साताभित्र सबै मन्त्रीले जवाफ दिनुपर्ने व्यवस्था नभएको समेत तर्क गरे । विपक्षी सांसद कुमार खड्काले त्यसको प्रतिकार गरे । सभामुखले दिनुपर्ने जवाफ सांसदहरुले दिन थालेको भन्दै प्रक्रियाविपरीत बोल्न नपाइने उनको भनाइ छ । ‘मुख्यमन्त्रीले पनि सदनको गरिमा मान्नुपर्छ । प्रश्न उठेपछि जवाफ दिनैपर्छ । नियमावली अनुसार जवाफ नदिएसम्म सदन अघि बढ््न सक्दैन,’ सभामुखलाई आग्रह गर्दै सांसद खड्काले भने, ‘संसद्को गरिमा हुन्छ । बोल्न पाइयो भनेर नियमविपरीत बोल्ने होइन । सभामुखले गर्ने रुलिङ माननीय सदस्यहरुले गर्ने हो भने यसरी सदन चल्न सक्दैन । संसद् कसैको भाषण गर्ने चौतारी होइन ।’ मन्त्रीहरुले जवाफ नदिएको विषयमा मात्रै ५ पटकसम्म नियमापत्ति भैसकेको छ ।
Related News
सम्बन्धित समाचार
कसको हातमा पर्ला वर्ष खेलाडीको उपाधि ?
गण्डकी प्रज्ञा–प्रतिष्ठानले ७ जना श्रष्टालाई सम्मान गर्दै
मुग्लिन–पोखरा सडक खण्डमा १३ वटा पुल सम्पन्न, ११ निर्माणाधीन
प्रदेशमा सञ्चालित आयोजनाहरुको प्रगति विवरण २ दिनभित्र पेस गर्न मुख्यमन्त्रीको निर्देशन
गण्डकी सरकारविरुद्ध सर्वोच्चमा कांग्रेसले दर्ता गरायो रिट, पेसी पर्सि
hero news full width
मुख्य समाचार
सुरु भयो ट्राफिक सप्ताह, मुख्यमन्त्रीले गरे उद्घाटन
गण्डकीका सभामुखको कदमबारे मिश्रित प्रतिक्रिया
वैशाख २५, २०८१मुख्यमन्त्री अधिकारीले रोजे पुरानै मन्त्री
वैशाख २५, २०८१ट्राफिक सप्ताहको ब्यानरमा प्रदेशका मन्त्रीको शपथ !
वैशाख २४, २०८१फडिन्द्रले इन्कार गर्दा माओवादीले दिन सकेन मन्त्री
वैशाख २४, २०८१गण्डकीमा एमालेका सीता सुन्दास र बेदबहादुरले लिए मन्त्रीको शपथ
वैशाख २४, २०८१