लमजुङ, ५ भदौ । लमजुङको एक विद्यालयमा एक लाख २७ हजार छात्रवृत्ति वितरण गरिएको छ । बेसीशहर नगरपालिका– ७ को चण्डिडाँडा स्थित जनविकास माध्यमिक विद्यालयले छात्रवृत्ति वितरण गरेको हो ।

छात्रछात्रालाई पठनपाठनमा सहयोग पुगोस् भन्ने उद्देश्यले छात्रवृत्ति वितरण गरिएको सो माविका प्रधानाध्यापक खिला शर्मा धितालले बताए । उनका अनुसार विद्यालयको शिक्षास्तर बृद्धि एवम् प्रविधि मैत्री विद्यालय बनाउने क्षेत्रमा काम गर्दै आएको संस्था किस इक्युपले विद्यार्थीलाई छात्रवृत्ति वितरण गरेको हो ।

उक्त संस्थाले विद्यालयमा आयोजित एक कार्यक्रम बीच १० जना छात्रछात्रालाई उक्त छात्रवृत्ति रकम वितरण गरेको हो । विद्यार्थीको नियमित अध्ययन र उनीहरुको शैक्षिक गुणस्तर वृद्धिमा थप सहयोग पु¥याउने उद्धेश्यले प्रति विद्यार्थी १२ हजार ७ सय रुपैयाँका दरले १ लाख २७ हजार रुपैया छात्रवृत्ति प्रदान गरेको विद्यालयकाले सहायक प्रधानाध्यपक राजु थापाले जानकारी दिए ।

उनका अनुसार सम्बन्धित विद्यार्थीका अभिभावकको उपस्थितमा छात्रवृत्तीका दाता किस इक्युपका दिलवहादुर कार्की, विद्यालय व्यवस्थापन समितिका अध्यक्ष भिमवहादुर बस्नेत र विद्यालयका प्रधानाध्यपक खिला शर्मा धितालले सयुंक्त रूपमा विद्यार्थीलाई छात्रवृत्ति रकम प्रदान गरेका हुन् । किस इक्युपले जनविकास माविमा गत वर्षदेखि वार्षिक रूपमा गरिव तथा जेहेन्दार विद्यार्थी छात्रवृत्ति वितरण गर्दै आएको छ भने यसै वर्ष विद्यालयलाई कम्यूटर समेत सहयोग गरेको थापाले जानकारी दिए ।