पोखरा । शिक्षासेवी नारायण सिग्देलको स्मृतिमा श्रीराम आधारभूत स्कुलमा छात्रवृत्तिका लागि अक्षयकोषको स्थापना गरिएको छ । स्व. सिग्देलको स्मृतिमा उनको परिवारले अक्षयकोषको स्थापना गरेको हो ।

सिग्देलकी श्रीमती हरिमाया सिग्देल र छोरा डा. यज्ञराज सिग्देलले १ लाख रुपैयाँको अक्षयकोष स्थापना गरेका हुन् । पोखरा ८ सिमलचौरस्थित सो विद्यालयका संस्थापक प्रधानाध्यापक रहेका नारायण सिग्देलले ३० वर्षसम्म अध्यापन गराएका थिए ।

अक्षयकोषका लागि विद्यालयका प्रधानध्यापक तीर्थराज न्यौपाने, विद्यालय व्यवस्थापन समितिका अध्यक्ष मुक्ति चालिसे, पोखरा ८ का वडाध्यक्ष रुद्रनाथ बराल लगायतको उपस्थितिमा हरिमाया सिग्देल र डा.यज्ञराज सिग्देलले १ लाख रुपैयाँका चेक हस्तान्तरण गरे ।

१ लाख रुपैयाँबाट आएको ब्याजबाट जेहेन्दार विद्यार्थीलाई छात्रवृत्ति दिइने प्रधानाध्यापक न्यौपानेले बताए ।