पोखरा । शीतलादेवी राम्चे मन्दिर भएको ठाउँ आसपासमा खर्क नै खर्क थिए । खर्कमा लगिएका पशुचौपायाको सुरक्षा हुने विश्वासका साथ खर्सु रुखको फेदमा शीतलादेवी राम्चेकोे थान खडा गरी पूजाआजा थालिएको थियो । किसानहरूले पूजा गरेपछि समस्याबाट मुक्ति पनि पाए,’ यो किंवदन्ती सुनाउँदै थिए पं. वेदप्रसाद पौडेल । १८६० साल ताका त्यहाँ देवीको पूजा सुरु भएको थियो । वेदप्रसादका बुबा देवीदत्त २०११ सालदेखि सोही मन्दिरमा पूजारी थिए । शीतलादेवी राम्चेमा औंसीको दिनबाहेक सबै दिनमा पूजा हुन्छ, विशेष गरी बडादसैं र चैते दसैं, बालाचतुर्दशी, शिवरात्रिमा भक्तजनको घुइँचो लाग्छ । धान रोपाइँ सुरु गर्दा र दाइँ राख्नु अघि देवीको पूजा गर्नै पर्ने स्थानीयको विश्वास छ ।
मन्दिर क्षेत्रलाई धार्मिक तथा पर्यटकीय क्षेत्रको रुपमा विकास गर्ने उद्देश्यले आठौं चैतेदसैं मेला आयोजना गरिएको छ । प्रदेश सांसद नन्दकली नेपालीले मेला उद्घाटन गर्दै सो क्षेत्र आफ्नो गृह क्षेत्र भएको र पिछडिएकाले पर्यटकीय क्षेत्रका रुपमा विकास गर्न पहल गर्ने उल्लेख गरिन् । उनले भनिन्, ‘मलाई सासू ससुराबाट प्रेरणा मिलेको छ, राम्चेदेवी क्षेत्रको विकासमा प्रतिबद्ध छु ।’ उनले वडा, गाउँपालिका र प्रदेशसँग समन्वय गरी काम गर्ने बताइन् ।
फेदीखोला ४ का अध्यक्ष ख्यामनारायण पौडेलले सडक स्तरोन्नति र बिस्तारका लागि पहल गर्ने बताउँदै मेला सञ्चालनका लागि वडाबाट आफ्नो कार्यकालभरि वार्षिक १ लाख विनियोजन गर्ने घोषणा गरे ।
राम्चेदेवी मन्दिर व्यवस्थापन समितिका सल्लाहकार मे. दिलबहादुर गुरुङले गुरुयोजना नै बनाएर अघि बढिएको बताए । उनले भने, ‘धार्मिक शक्ति प्राप्त भएको छ, मन्दिर निर्माण गरिएको छ, लिफ्टिङ गरेर खानेपानी व्यवस्थापनको प्रयास गरिएको छ ।’ सल्लाहकार गुरुङ ढिकी चौरमा प्याराग्लाइडिङ, राम्चेदेवी मन्दिरसम्म हाइकिङ, चील डाँडामा पार्क लगायतको संरचना निर्माण तथा व्यवस्थापनको पहल भइरहेको बताउँछन् । मन्दिर क्षेत्रमा बिजुली, पानी, शौचालय र घामपानीबाट बच्न ट्रस्टको व्यवस्थापन सामान्यरुपमा भइसकेको छ । पन्चासे क्षेत्र विकास समितिको २ लाख सहयोगमा १ ट्रस्ट निर्माण भएको हो । पञ्चासेबाट डेढ घन्टा र पुम्दीकोटबाट करिब २ घन्टा पैदल यात्रामा राम्चेदेवी पुग्न सकिने गुरुङ बताउँछन् ।
मन्दिर व्यवस्थापन समिति अध्यक्ष राजकुमार ढकालले आफूहरूले सो क्षेत्रलाई धार्मिक तथा पर्यटकीय क्षेत्र बनाउन प्रतिबद्ध भए पनि गाउँपालिकाबाट उचित सहयोग प्राप्त नभएको गुनासो गरे । उनले भने, ‘हामीले यस क्षेत्रको विकासका लागि धेरैतिरबाट पहल गरिरहेका छौं तर गाउँपालिकाले कालाभैरव मन्दिरलाई सहयोग गरे पनि शीतलादेवी राम्चे मन्दिरलाई वास्ता गरेन ।’ अध्यक्ष ढकालले खानेपानी, पूजारी आवास र सडक प्राथमिकतामा राखेर काम गर्नुपर्ने आवश्यकता औंल्याए ।
मेलाअन्तर्गत सञ्चालित पुरुष फुटबल प्रतियोगितामा ढुकढुकी युवा क्लब आयोजक ‘ए’ लाई पराजित गर्दै परिवर्तन युवा क्लब खर्केटारी विजयी भएको शीतला युवा क्लब अध्यक्ष दीपेन्द्र पौडेलले बताए । विजेताले ३० हजार र उपविजेताले २० हजार पुरस्कार प्राप्त गरे । विजेतालाई पोखरा १० का पूर्व अध्यक्ष राजकुमार गुरुङ र फेदीखोला ४ का अध्यक्ष पौडेलले पुरस्कार वितरण गरे । प्रथम पुरस्कार प्रायोजन गलेम राँपुमा जन्म भई युकेमा बस्नेहरूले गरेका थिए भने द्वितीय पुरस्कार वडाध्यक्ष पौडेलको पहलमा उनका भतिज युवराज पौडेल (ईश्वर) ले नेदरल्यान्डबाट गरेका थिए । प्रतियोगितामा ७ टिमले भाग लिएका थिए ।

सो क्षेत्रको प्रचारका लागि चैतेदसैंमा ८ वर्षदेखि मेला गरिएको छ । कार्यक्रममा चन्दादाता तथा विभिन्न सहयोगदातालाई दोसल्ला र प्रमाणपत्रले सम्मान गरिएको थियो । कार्यक्रमबीच नवनिर्मित ट्रस्टको प्रदेश सांसद् नेपालीले उद्घाटन गरिन्् । कार्यक्रम सञ्चालन सुभाष लामिछाने र शीतला माविका प्रअ तुलसीराम पौडेलले गरेका थिए । क्लब सचिव चेतबहादुर गुरुङले स्वागत गरेका थिए ।