पोखरा । पोखरा प्रदर्शनी केन्द्रमा आइतबारबाट श्रीमद्भागवत् सप्ताह ज्ञानमहायज्ञ २०८१ सुरु भएको छ ।

ज्ञानमहायज्ञ शुभारम्भ अघि सेती नदीस्थित गाईघाटबाट शान्ति कलशसहितको शोभा यात्रा तथा बाजागाजासहितको धार्मिक झाँकीले बजारको विभिन्न ठाउँको परिक्रममा गर्दै महायज्ञ स्थलमा पुगेको थियो ।

महायज्ञ शुभारम्भ गर्दै गलेश्वर आश्रम देवघाटधाम तनहुँका पीठाधीश अनन्तश्रीविभूषित स्वामी आत्मानन्द गिरी महाराजले धर्म, संस्कार र संस्कृति संरक्षणमा महायज्ञले टेवा पु¥याउने बताए । उनले ज्ञानभूमि काशीलाई स्मरण गराउने कास्की कश्यप ऋषिको तपोभूमि रहेको बताउँदै लोककल्याण तथा विशुद्ध आध्यात्मिक साधनाको उद्देश्यमा महायज्ञ केन्द्रित रहेको उल्लेख गरे ।

ज्ञानमहायज्ञका प्रमुख भागवत्वाचक हरिहर सन्यास आश्रम, देवघाटधाम तनहुँका पीठाधीश अनन्तश्रीविभूषित स्वामी ज्ञानानन्द सरस्वतीजी महाराज, महेश सन्यास आश्रमका पीठाधीश श्री रमणान्द गिरीजी महाराज, श्री १००८ स्वामी केशवानन्द गिरीजी महाराज लगायतको उपस्थिति थियो ।

ज्ञानमहायज्ञ सम्पादन समिति अध्यक्ष लक्ष्मण पौडेल, सहअध्यक्ष महेश पराजुली, उपाध्यक्ष सूर्यप्रसाद भण्डारी, राप्रपाका नेता रवीन्द्र मिश्र, नेपाली कांग्रेस कास्कीका सभापति किशोरदत्त बराल, पूर्व सभापति सोभियत अधिकारीलगायतले सनातन धर्म र भागवत्को प्रभावले नै विश्वमा लोकको कल्याण हुनको साथै विश्वमा शान्ति फैलने विषयमा जोड दिए ।

सामाजिक, धार्मिक सद्भाव र सहिष्णुता वृद्धि गर्ने हिसाबले आयोजना गरिएको ज्ञानमहायज्ञ वैशाख १० गतेसम्म सञ्चालन हुनेछ ।
वैशाख ३ गतेदेखि ९ गतेसम्म पाठ परायण, प्रवचन तथा अनुष्ठान हुने र १० गते अन्तिम दिन महायज्ञको पूर्णाहुति एवंं अभिषेकसहित प्रसाद वितरण गरी महायज्ञको समापन हुने आयोजकले जनाएको छ ।