पोखरा । ट्रेकिङ एजेन्सिज् एसोसिएसन अफ नेपाल (टान) गण्डकीले दिगो पर्यटकीय अभ्यास र वातावरणीय अपराध रोकथामसम्बन्धी सचेतना कार्यक्रम गरेको छ ।

अमेरिकी विकास सहयोग नियोग (युएसएड) को जलजंगल परियोजना (अमेरिकी जनता) सहयोगमा दुइदिने सचेतना कार्यक्रम गरेको हो । जलजंगल परियोजनाअन्तर्गत पदयात्रा तथा पर्वतीय पर्यटन गन्तव्य पर्यापर्यटनको माध्यमबाट जैविक विविधता संरक्षणमा योगदान पु¥याउने उद्देश्यले कार्यक्रम गरिएको टान गण्डकीले जनाएको छ ।

कार्यक्रममा पदयात्रा क्षेत्रमा संलग्न पथप्रदर्शक तथा सहयोगीलाई सचेतना प्रदान गरिएको टान गण्डकी अध्यक्ष कृष्णप्रसाद आचार्यले जानकारी दिए । उनीहरुलाई बिहीबार एक कार्यक्रम आयोजना गरी प्रमाणपत्र पनि प्रदान गरियो ।

तालिमका सहभागीलाई गण्डकी प्रदेशका उद्योग तथा पर्यटन मन्त्री मित्रलाल बस्याल, टानका केन्द्रीय महासचिव सोनाम ग्याल्जेन शेर्पाले प्रमाणपत्र प्रदान गरे ।

कार्यक्रममा मन्त्री बस्यालले पछिल्लो समय पर्यटन क्षेत्र पीडादायी अवस्थामा रहेको बताए । यो क्षेत्रलाई पहिलेकै अवस्थामा फर्काउन पर्यटन नीति आवश्यक रहेको उनको भनाइ थियो । ‘पहिले पोखराको लेकसाइडमा धेरै मात्रामा विदेशी पर्यटक हुन्थे । पछिल्लो समयमा पर्यटकको आवागमन त्यति छैन । पर्यटन व्यावसायीहरुलाई अप्ठेरो छ । उहाँहरु पीडामा हुनुहुन्छ,’ उनले भने, ‘सोही कारण मैले पदभार ग्रहण गरेकै दिन पर्यटन नीति बनाउने भनेको छु । नीति बनाएपछि हामीसँग भएका क्षमता, बजेट, सम्भावना हेरेर पर्यटन व्यावसायी र सरकार एक ढिक्का भएर काम गरे हामीले केही उपलब्धि हासिल गर्न सक्छौं ।’

पर्यटनमा सम्भावना र चुनौती दुवै भएकाले यसलाई टकेर अघि बढ्न उनको सुझाव थियो । यसका लागि पर्यटन व्यवसायीसँग मन्त्रालय कसरी अघि बढ्ने भन्ने विषयमा सल्लाह, सुझाव लिन तयार रहेको उनले बताए ।

कार्यक्रममा पोखरा उद्योग वाणिज्य संघका अध्यक्ष गोकर्ण कार्की, टान महासचिव सोनाम ग्याल्जेन शेर्पा, पोखरा पर्यटन परिषद्का वरिष्ठ उपाध्यक्ष हरिबहादुर भुजेल, टान गण्डकी पूर्व अध्यक्ष तथा सल्लाहकार टीकाराम सापकोटा, नेपाल पर्यटन बोर्डका वरिष्ठ अधिकृत कुन्दन मिश्र, युएसएडको जलजंगल परियोजनाका टिम लिडर मनबहादुर बिक, नाट्टा गण्डकी अध्यक्ष किशोर दाहाल, टानका प्रमुख कार्यकारी अधिकृत रामचन्द्र सेढाईं, टान गण्डकी वरिष्ठ उपाध्यक्ष तीर्थराज सुवेदी, प्रशिक्षार्थी कमल कार्की लगायतले पदयात्रा तथा पर्वतीय पर्यटनमा दिगो पर्यटकीय अभ्यास हुनुपर्नेमा जोड दिए ।