पोखरा । पोखराको धार्मिकस्थल ढुंगेसाँघु चिनाउन कोटी होम आयोजना गरिने भएको छ । आगामी मंसिरमा पोखरा १५, ढुंगेसाँघुमा शिव मन्दिर उद्घाटनसँगै प्राण प्रतिष्ठा, लघु रुद्रीसहितको विराट धनधान्याञ्चल कोटी होम, कोटी द्वीप प्रज्ज्वलन, पितृ उद्धार भक्तिज्ञान महायज्ञ हुने भएको हो ।

सोमबार पत्रकार सम्मेलनमा महायज्ञ मूल आयोजक समिति संयोजक मदन गिरीले तीन दशकपछि यहाँ कोटी होम हुन लागेको बताए । पछिल्लो समय युवामा धार्मिक सांस्कृतिक ज्ञानको समेत कमी हुँदै जाँदा गण्डकी रिभर साइड युवा क्लब भने धार्मिक कार्यमा जुटिरहेको उनले बताए । कोटी होम भनेको के हो, कसरी गरिन्छ र यसको महत्व के हो भन्नेबारे समेत जानकारी दिने गरी कोटी होम तयारीमा जुटेको बताए ।

कोटी होम शास्त्रअनुसार नै हुने र त्यसका लागि दान गर्न सक्नेले गर्ने नसक्नेले निशुल्क रुपमा सहभागी हुन सक्ने उनले बताए । ‘हामीले कोटी होमका लागि रकम दिनुपर्छ भनेर भन्दैनौं न त दबाब नै दिन्छौ । यदि दिनसक्ने हुनुहुन्छ भने दिन सक्नुहुन्छ सक्नु हुन्न भने पनि आएर पुण्य कार्यमा सहभागी हुन सक्नुहुन्छ,’ उनले भने, ‘ढुंगेसाँघु लुकेको तीर्थस्थल हो । यहाँ धार्मिक महत्व बोकेको ठाउँ छन्, तिनीहरुको पहिचान गराउनु हाम्रो उद्देश्य हो ।’

उनका अनुसार त्यहाँ विभिन्न पूजाआराधना पनि हुन्छ । यस्तै कोटी होमकै क्रममा निशुल्क ब्रतबन्ध तथा धनको अभाव वा सन्तान नभएका ८४ वर्ष पुगेका वृद्धवृद्धाका लागि पूजा समेत लगाउने व्यवस्था गरिने छ ।

रिभर साइड युवा क्लब अध्यक्ष नारायण भण्डारीले पुरानो धार्मिक इतिहास जीवन्त पार्न कोटी होमको आयोजना गर्न लागेको बताए । सुरुवातमा ढुंगालाई पुज्दै आएको ठाउँमा अहिले मन्दिर निर्माण भइरहेको र प्राणप्रतिष्ठासँगै कोटीहोम आयोजना गर्न लागेको जानकारी दिए । ढुंगेसाँघु पितृ र देउतालाई पुज्ने एकै थलो भएकाले यसको महत्व छुट्टै भएको सुनाए ।

अर्जुन ढकालले ढुंगेसाँघु धार्मिक क्षेत्र भए पनि प्रचारप्रसार अभावले निकै पछि पर्दै गइरहेको र यसलाई जीवन्त पार्ने कोशिसको थालनी गरेको बताए । उनले कोटी होममा आई पुण्यको काम गर्न समेत अनुरोध गरे । कोटी होममा प्रमुखवाचक जयश्री राधे गुरु तथा मन्दिर संरक्षक शोभाकान्त ढकाल रहेका छन् । हालै काठमाडौं पशुपतिमा हालैमात्र भएको कोटीहोमको देशविदेशमा चर्चा भएको थियो ।