पोखरा । पोखरेली कलाकार एवं निर्देशक माओत्से गुरुङ सम्मानित भएका छन् । संविधान दिवस सन्दर्भमा चलचित्र विकास बोर्डद्वारा शुक्रबार आयोजित ‘सांस्कृतिक रुपान्तरण पुरस्कार–२०८१’ कार्यक्रममा कलाकार एवं फिल्म निर्देशक गुरुङलाई  चलचित्रमार्फत समाज रुपान्तरणका लागि योगदान पुर्‍याएकोमा सम्मान गरिएको हो ।

समारोहमा उनीसहित कलाकार रमेशरञ्जन झा, कविता आले, देशभक्त खनाल, ऋद्धिचरण श्रेष्ठ, विकास चौधरी, प्रेमा अधिकारी गैरेलाई पनि पुरस्कृत गरियो ।

यसै चलचित्रमार्फत सांस्कृतिक रुपान्तरणमा योगदान पुर्‍याएका पाँच कलाकारलाई पुरस्कार प्रदान गरिएको छ । बलिदानका निर्देशक तुलसी घिमिरे, अभिनेता नीर शाह, संगीतकार श्याम तमोट, गायिका लोचन भट्टराई पुरस्कृत भएका हुन् । पुरस्कृत सम्पूर्णलाई जनही २५ हजार नगद र ताम्रपत्रसहित सम्मान गरिएको हो ।

कार्यक्रममा चलचित्र विकास बोर्डले नेपाली चलचित्र ‘बलिदान’ लाई यो वर्षको सांस्कृतिक रुपान्तरण पुरस्कार–२०८१ ले सम्मान गरेको छ । नेपाली चलचित्र इतिहासको एक उत्कृष्ट एवं कालजयी चलचित्रमार्फत राष्ट्रियता, सामाजिक न्याय, अभिव्यक्ति स्वतन्त्रता, मानवीय गरिमा र मूल्यको प्रवद्र्धन तथा समाजमा वैचारिक एवं भावनात्मक जागरण अभिवृद्धि गरी सांस्कृतिक रुपान्तरणमा योगदान गर्ने चलचित्रलाई वर्षेनी सम्मान गरिने बोर्डले निर्णय गरेको हो ।

उनीहरुलाई सञ्चार तथा सूचना प्रविधिमन्त्री पृथ्वीसुब्बा गुरुङले सम्मान गरेका हुन् । मन्त्री गुरुङले समाज रुपान्तरणमा चलचित्र क्षेत्रको अतुलनीय योगदान रहेको बताए । गुरुङले चलचित्रको उत्थान गर्न मन्त्रालयले भरपूर सहकार्य गर्ने प्रतिबद्धता जनाए ।