लेखनाथ । पोखरा उद्योग वाणिज्य संघको नवनिर्वाचित टिमलाई लेखनाथ उद्योग वाणिज्य संघले शुक्रबार स्वागत तथा बधाई ज्ञापन गरेको छ ।

संघको हालै सम्पन्न ३५ औं अधिवेशनबाट निर्वाचित गोकर्ण कार्कीको अध्यक्षताको टिमलाई लेउवा संघ अध्यक्ष विनोद श्रेष्ठले हार्दिक बधाई ज्ञापन गर्दै सफल कार्यकालको शुभकामना व्यक्त गरे । श्रेष्ठले विगतदेखिकै परम्परालाई निरन्तरता दिंदै स्वागत तथा बधाई कार्यक्रमको आयोजना गरिएको बताउँदै यसले आपसी भाइचारालाई अझै वृद्धि गराउने र सहकार्यको वातावरण सहज हुने विश्वास व्यक्त गरे ।

लेउवा संघका संस्थापक अध्यक्ष चन्द्रकृष्ण कर्माचार्यले लेउवा संघले स्थापनाकालदेखि उद्योगी व्यवसायीको हितमा मात्र काम नगरी, समग्र लेखनाथ क्षेत्रको विकासमा सक्रिय भूमिका खेलेको दाबी गरे । उनले आगामी दिनमा यो वा त्यो नभनी दुवै संघले व्यवसायीहरुको विषयमा साझा धारणा बनाएर सहकार्य गर्दै अघि बढ्नुपर्ने सुझाव दिए ।

पोखरा उद्योग वाणिज्य संघका निवर्तमान अध्यक्ष पवनकुमार प्रजापतिले समग्र पोखराको विकासका लागि मिलेर उदाहरणीय काम गर्ने प्रतिबद्धता व्यक्त गरे । कार्यक्रममा पोखरा उद्योग वाणिज्य संघका नवनिर्वाचित अध्यक्ष गोकर्ण कार्कीले लेउवा संघ संघ र पोउवा संघ विगतमा कतिपय मुद्दामा एक हुन नसकेका कारण समग्र पोखरेलीलाई घाटा पुगेको स्मरण गर्दै अगामी दिनमा समग्र पोखराको आर्थिक विकासको लागि र समृद्ध पोखरा निर्माणका लागि साझा एजेण्डा लिएर महासंघसम्म पुग्दा पनि एक हुने प्रद्धिबद्धता व्यक्त गरे ।

लेउवा संघ अध्यक्ष विनोद श्रेष्ठको अध्यक्षतामा सम्पन्न कार्यक्रमको सञ्चालन महासचिव जानुका पराजुली र धन्यवाद ज्ञापन वरिष्ठ उपाध्यक्ष राजेन्द्र ओझाले गरेका थिए ।