पोखरा । पोखरा उद्योग वाणिज्य संघले लक्ष्मी ग्रुपअन्तर्गत सुजल डेरी प्रालि र सेलवेज डिपार्टमेन्टल स्टोर गरी २ संस्थालाई सर्वोत्कृष्ट व्यवसायी सम्मान प्रदान गरेको छ ।

संघको शुक्रबारदेखि सुरु ७० औं साधारण सभा तथा ३५ औं महाअधिवेशन उद्घाटन समारोहमा उनीहरुलाई उक्त सम्मान प्रदान गरिएको हो । प्रमुख अतिथि पोखरा महानगरपालिकाका प्रमुख धनराज आचार्य, पोखरा उद्योग वाणिज्य संघका अध्यक्ष पवनकुमार प्रजापतिले माला, दोसल्ला, पुष्पगुच्छा र सम्मानपत्रसहित सम्मान गरेका हुन् ।

उक्त सम्मान सुजल डेरीका तर्फबाट लक्ष्मी ग्रुपका कार्यकारी निर्देशक सुनिल श्रेष्ठले अवार्ड ग्रहण गरे । यस्तै, सेलवेज डिपार्टमेन्टलका अध्यक्ष सुशीलमान प्रधानाङ्गले ग्रहण गरे ।

सुजल र सेलवेज पोखराका पुराना व्यापारिक संस्था हुन् । सेलवेजका संस्थापक सर्वज्ञमान प्रधानाङ्ग पोखरा उद्योग वाणिज्य संघका पूर्व अध्यक्षसमेत रहेको सुशीलले बताए ।

पोखरामा स्थापित विभिन्न औद्योगिक तथा व्यापारिक प्रतिष्ठानहरुमध्ये उद्योगतर्फ र वाणिज्यतर्फ गरी एक एक प्रतिष्ठानलाई सो अवार्ड प्रदान गरिंदै आएको जनाइएको छ । अवार्ड वितरण सत्रलाई पोखरा उद्योग वाणिज्य संघका पूर्व अध्यक्ष वसन्त उदासले संचालन गरेका थिए ।