पोखरा । चलचित्र ‘फूलबारी’ का कलाकार प्रचारप्रसारका लागि पोखरा आएका छन् । आगामी फागुन ५ गतेबाट प्रर्दशन हुने चलिचित्रको प्रमोशनका लागि टिम बुटवल हुँदै पोखरा आएको हो ।

चलचित्र टिमले सोमाबार पोखरामा पत्रकार भेटघाट गरेको छ । सो अवसरमा अभिनेता विपीन कार्की, प्रियंका कार्की, शिल्पा मास्के, संगीतकार तथा गायक कालीप्रसाद बास्कोटा लगायतको टोलीले पोखरामा भएको पत्रकार सम्मेलनमा सहभागिता जनाएर फिल्मबारे जानकारी दिएको छ ।

रामबाबु गुरुङले निर्देशन गरेको फिल्म ‘फूलबारी’ मा विपीन कार्की र अरुणा कार्की मुख्य भूमिकामा छन् । विपीन र अरुणा दम्पत्तीको भूमिकामा देखिएको फिल्मको ट्रेलरले परिवारको बेमेल र आउने उतारचढावलाई देखाएको कलाकार विपिन कार्कीले बताए ।

यशोदा फिल्मस्को ब्यानरमा बनेको फिल्ममा उपेन्द्र सुब्बाको पटकथा, किशोर मलपानीको कथा रहेको छ । अमेरिकी छायाँकार जोस हेरमले फिल्म खिचेको फिल्मलाई निमेष श्रेष्ठले सम्पादन गरेका हुन् ।