पोखरा । नवौं राष्ट्रिय खेलकुदअन्तर्गत महिला भलिबलमा शुक्रबार एपिएफ, नेपाल पुलिस र बागमती प्रदेशले जीत हात पारेका छन् ।

म्याग्दीको बेनीस्थित खुला मञ्च खेलमैदानमा भएको पहिलो खेलमा एपिएफ क्लबले कर्णाली प्रदेश, बागमतीले प्रदेश १ र नेपाल पुलिस क्लवले लुम्बिनीलाई लाई पराजित गरेका हुन् । तीन वटै खेल लगातार सोझो सेटमा सकिएको थियो ।

एपिएफले कर्णालीलाई २५–६, २७–२ र २५–७, बागमतीले प्रदेश एकलाई २५–१७, २५–१२ र २५–१२ तथा पुलिसले लुम्बिनीलाई २५–१०, २५–११ र २५–१९ को सोझो सेटमा हराएका हुन् ।

शुक्रबारको खेलमा एपिएफकी पवित्रा भट्ट, बागमतीकी सलिना बुढाथोकी, र पुलिसकी लक्ष्मी चन्द्रले वुमन अफ म्याच बने ।

बिहीबार उद्घाटन खेलमा गण्डकीले सुदूरपश्चिमलाई सोझो ३ सेटमा पराजित गरेको थियो ।

समूह विजेता बन्दै गण्डकी र नेपाल पुलिस क्लव क्वाटर फाइनलमा प्रवेश गरेका छन् । शनिबार कर्णाली प्रदेश र त्रिभुवन आर्मी, मधेश प्रदेश र प्रदेश १ बीच प्रतिस्पर्धा हुनेछ । कात्तिक २ सम्म सञ्चालन हुने प्रतियोगितामा एनआरएनबाहेक सबै टिमले भाग लिएका छन् । प्रतियोगिता लिक कम नकआउट आधारमा खेलाइएको प्रतियोगिता संयोजक यामबहादुर गुरुङले जानकारी दिए ।