पोखरा । नेपाल लोकतान्त्रिक खेलकुद संघ कास्कीले आगामी जेठ २ देखि ५ सम्म प्रथम क्लबस्तरीय पुरुष भलिबल आयोजना गर्ने भएको छ ।

सोमबार पत्रकार सम्मेलनमा संघ कास्की अध्यक्ष नवीन पुनले प्रतियोगिताको तयारी अन्तिम चरणमा पुगेको बताए । विजेताले १ लाख २० हजार, उपविजेताले ८० हजार, तेस्रो हुने समूहले ४० हजार र सान्त्वना हुने समूहले २० हजार रुपैयाँसहित ट्रफी, मेडल र प्रमाणपत्र प्राप्त गर्ने छन् ।

नदीपुरस्थित छन्त्याल समाजको भलिबल कोर्टमा हुने प्रतियोगितामा १२ टिमलाई मात्र समावेश गराइने प्रतियोगिता संयोजक अमृत लामा गुरुङले बताए । संयोजक गुरुङले भने, ‘प्रतियोगितामा सहभागिता जनाउन १ टिममा सातौं, आठौं र नवौं राष्ट्रिय खेलकुद प्रतियोगितामा समावेश भएका ३ जना खेलाडी मात्र सहभागिता हुन पाउनेछ ।’

संघ केन्द्रीय अध्यक्ष देवेन्द्रकुमार शेरचनले गण्डकीका प्रदेशका ९ जिल्लामा विभिन्न खेलकुद प्रतियोगिताका विधाहरु सञ्चालन गर्दै आएको बताए । ‘नेपाल लोकतान्त्रिक खेलकुद संघले गण्डकीका ११ मध्ये ९ जिल्लामा विभिन्न प्रतियोगिताहरु सञ्चालन गर्दै आएको छ,’ अध्यक्ष शेरचनले भने, ‘खेलकुदका विभिन्न विधामध्ये कास्कीमा पहिलो पटक भलिबल प्रतियोगिता आयोजना हुन लागेको हो ।’

प्रतियोगिताको उद्घाटन समारोहको दिन निशुल्क प्रवेश रहनेछ । ३ जेठदेखि टिकट शुल्क निर्धारण गरिएको छ । फाइनल खेल हेर्न २ सय रुपैयाँ लाग्नेछ ।