पोखरा । नवौं राष्ट्रिय खेलकुदअन्तर्गत पुरुष भलिबलमा गण्डकी प्रदेशले विजयी सुरुआत गरेको छ ।

पोखरा रंगशालास्थित भलिबल टेक्निकल सेन्टरमा शुक्रबारदेखि सुरु भएको खेलमा गण्डकीले वागमती प्रदेशलाई ३–१ सेटमा हराउँदै विजयी सुरुआत गरेको हो ।

समूह डिमा गण्डकी र वागमती मात्रै रहेकोले दुवै टिमले क्वाटरफाइनल चरण प्रवेश सुनिश्चित गरिसकेका छन् । दुई टिमले समूह विजेता बन्न प्रतिस्पर्धा गरेका हुन् ।

पहिलो सेट २५–२० ले परिणाम हात पारेको गण्डकीले दोस्रो सेट भने १५–२५ ले वाग्मतीलाई सुम्पियो । तेस्रो र चौंथो सेटमा गण्डकीले मौका दिएन । तेस्रो सेट २५–१८ ले जीत हात पार्दा चौंथो सेट सहज प्रतिस्पर्धामा २५–१४ ले गण्डकी विजयी भयो ।

उद्घाटन खेलमा विभागीय टिम पुलिसले कर्णाली प्रदेशलाई ३–० को सोझो सेटमा पराजित ग¥यो । साविक विजेता पुलिसले २५–१६, २५–१२ र २५–११ को सहज जीत निकालेको हो । लिग कम नकआउटको आधारमा हुने प्रतियोगितामा पुलिसले जितसँगै ३ अंक जोडेको छ ।

कुल ११ टिमध्ये समूह ‘ए’ मा पुलिस र कर्णालीसहित लुम्बिनी प्रदेश छन् । समूह ‘बी’ मा त्रिभुवन आर्मी, प्रदेश १ र मधेस प्रदेश, समूह ‘सी’ मा एपीएफ, एनआरएनए र सुदूरपश्चिम तथा समूह ‘डी’ मा गण्डकी र वागमती प्रदेश छन् ।

शनिबार पहिलो खेल एपीएफ र एनआरएनए, दोस्रो खेल त्रिभुवन आर्मी र प्रदेश १ र तेस्रो खेल पुलिस र लुम्बिनी प्रदेशबीच हुनेछ ।

फाइनल कात्तिक ३ मा हुनेछ ।