लेखनाथ । मनसुन सुरु भए पनि झरीबादल र वर्षाको कुनै प्रवाह छैन, उनलाई । बिहान सबेरै उठ्नु र बेलुका अबेरसम्म ड्युटीमा खटिनु उनको दैनिकी हो ।

यहाँ सरुवा भएर आएको पनि ४ महिना बितिसक्यो । उनलाई पत्तै छैन । एक्लो अभियानमा तल्लीन छन्, उनी ।

असारको बर्खेझरी, बिहानीको सिमसिम पानीबीच पनि ड्युटीमा देखिन्छन् । सवारीसाधन रोक्ने, मिठो वचन बोल्ने र सवारी चेकजाँच गर्ने उनी चालक, यात्रु वा सर्वसाधारण सबैले चिन्छन् ।

उनी हुन्, पोखरा वडा ३० र २९ स्थित अस्थायी ट्राफिक पोस्ट गगनगौडाका प्रहरी नायव निरीक्षक बद्रीनाथ शर्मा तिमिल्सेना । आफ्नो समस्या थाँती राखेर जनताको सेवामा समर्पित छन् । भन्छन्, ‘सबैलाई चेतनाहोस्, हामी जनताको सेवक हौं । शासक होइनौं ।’

उनी यस्तो अभियानमा लागेका छन् कि ट्रक, बस, मिनीबस, माइक्रोबस, मोटरसाइकल, स्कुटर लगायतका गाडी रोकेर चेकजाँच गरी नागरिकको सुरक्षामा सधैं ध्यान दिन्छन् ।

गाडीमा राखिने सोली झल्लर, प्रेसर हर्न, बत्ती अनावश्यक रंगप्रति सजग, सचेत र सतर्क गराउने, आपराधिक घटना कम गर्ने उद्देश्यले प्रहरीको पहुँच छिटो र प्रभावकारी बनाउन एवं प्रहरी र नागरिकबीचको सम्बन्ध प्रगाढ बनाउने तथा नागरिकमा शान्तिसुरक्षाको थप अनुभूति दिलाउन यो अभियान सञ्चालन गरिएको प्रहरी नायव निरीक्षक शर्मा बताउँछन् ।

‘नेपाली समाज नै मुख्य कार्यथलो रहेको प्रहरीको समाजमा शान्ति सुव्यवस्था कायम गरी जनतामा पुग्ने अभियान नै मेरो मुख्य प्रमुख दायित्व हो,’ उनी भन्छन् ।