पोखरा । सगरमाथा साहित्य प्रतिष्ठान नेपालले आयोजना गरेको विश्वव्यापी नेपाली कविता प्रतियोगितामा सर्वोत्कृष्टलाई पुरस्कार प्रदान गरेको छ ।

प्रतियोगितामा सर्वोत्कृष्ट हुन सफल रौतहटका कवि मनोज विश्वकर्मालाई ५५ हजार ५ सय ५५ रुपैयाँसहित उत्कृष्ट १० जनालाई उत्कृष्टताको प्रमाणपत्र प्रदान गरिएको थियो ।

सो अवसरमा डा योगी विकाशानन्द, प्राज्ञ हरिदेवी कोइराला र विम्बकवि रमेश श्रेष्ठले प्रतियोगितामा छनोट कविताको संग्रह ‘कविताहरुको सगरमाथा’ पुस्तकको संयुक्त विमोचन गरे ।

प्रतिष्ठानको गण्डकी शाखाको आयोजनामा पोखरामा भएको कार्यक्रममा प्रतिष्ठानका केन्द्रीय उपाध्यक्ष अमन एकल, महासचिव शाश्वत गोविन्द ढुंगाना, संस्थापक जिपी तिवारी, कार्यक्रम संयोजक एवं प्रतिष्ठानका केन्द्रीय सचिव अजित क्षत्रीलगायतले बोलेका थिए ।

प्रतिष्ठान गण्डकी शाखा अध्यक्ष शम्भु अर्यालको अध्यक्षतामा भएको कार्यक्रममा स्वागत उपाध्यक्ष छन्दिका त्रिपाठी र सञ्चालन सचिव लीली अधिकारीले गरेका थिए ।

कार्यक्रममा कास्की, तनहुँ, स्याङ्जा, पर्वत, पाल्पा, अर्घाखाँची, लमजुङ, बाँके, चितवन, नवलपरासी, झापालगायत जिल्लाका २० बढी साहित्यिक संस्थाका प्रतिनिधिको उपस्थिति थियो ।

प्रतिष्ठान नेपालको केन्द्रीय कार्यालय संयुक्त अरब इमिरेट्समा छ । २०६९ सालमा स्थापित सो संस्थाका केन्द्रीय अध्यक्ष कृष्ण विश्वकर्मा हुन् ।
संस्थाले केही वर्षयता वर्सेनि विभिन्न विधामा अन्तर्राष्ट्रिय प्रतियोगिता र पुस्तक प्रकाशन गर्दै आएको केन्द्रीय सचिव क्षत्रीले बताए ।