पोखरा । क्रियाशील पत्रकारका लागि पोखरामा भाषा सम्पादन तालिम शुक्रबार सुरु भएको छ । पोखरा महानगरपालिकाको सहयोगमा नेपाल पत्रकार महासंघ कास्कीको आयोजनामा ३ दिने तालिम सुरु भएको हो ।

तालिमको सहजकर्ता भाषाविज्ञ शरच्चन्द्र वस्ती र पत्रकार विमल आचार्य छन् । गण्डकी प्रदेश सरकारका मुख्यमन्त्री खगराज अधिकारीले उद्घाटन गरे । उनले भाषा अग्रगामी हुने र भाषाको विषयमा पत्रकार सक्षम हुनुपर्ने आवश्यकतालाई औंल्याएका छन् । तालिमले भाषाको कलात्मकताको विषयमा सुधार ल्याउन मद्दत पुग्ने विश्वास लिएका छन् । ‘सञ्चार जगतमा काम गर्ने सञ्चारकर्मीले भाषाका विषयमा ख्याल गर्नुपर्ने देखिन्छ । भाषाका विषयमा समयसापेक्ष हुन सकेनौं भने स्वभाविक रुपमा आक्रमण हुँदै जान्छ,’ उनले भने ।
सहजकर्ता शरच्चन्द्र वस्तीले सबैखालको विषयगत रिर्पोटिङका लागि भाषा महत्वपूर्ण भएको बताए । समाचारमा भाषाको प्रयोग गर्दा अनर्थ नलाग्ने शब्दको प्रयोग गर्नुपर्ने आवश्यकतालाई औंल्याएका छन् ।

प्रेस काउन्सिल सदस्य दुर्गा भण्डारीले सञ्चारमाध्यममा आएका समाचारमा भाषाशैली स्तरिय नहुँदा समस्या आएको बताइन् ।

पत्रकार महासंघ गण्डकी प्रदेशका महासचिव गोविन्द सुवेदीले भाषा शुद्धीकरणमा तालिम महत्वपूर्ण हुने विश्वास व्यक्त गरे ।

पत्रकार महासंघ कास्कीका अध्यक्ष विमला भण्डारीले गण्डकी सरकार प्रेसमैत्री तवरले अगाडि बढ्न आग्रह गरिन् । तालिम संयोजक पत्रकार महासंघ कास्कीका उपाध्यक्ष रामप्रसाद तिमिल्सिनाले नेपाली भाषामा पटकपटक आक्रमण हुँदा समस्या खेप्नुपरेको बताए ।