१. कोरोना भाइरसको संक्रमण नियन्त्रणमा सरकारले राम्रो ध्यान दिन नसकेको भन्दै यतिखेर देशका विभिन्न शहरमा युवाहरुले प्रदर्शन गरिरहेका छन् । उनीहरुले प्रधानमन्त्री निवास क्षेत्र वालुवाटारमा समेत प्रदर्शन गरे । आन्दोलन रोक्न प्रहरीले प्रदर्शनकारी माथि पानीको फोहोरा र अश्रु ग्यास हान्ने लगायतका हथकण्डाहरु अपनायो । प्रदर्शन रोकिएको छैन ।

२. सरकारविरुद्ध प्रदर्शन गर्दै उनीहरुले स्वास्थ्य सामग्री खरिद पारदर्शी हुनुपर्ने, आरटिडि रोकेर पिसिआर जाँच गरिनुपर्ने, कर तिर्न ताकेता हटाउनुपर्ने लगायतका माग गरेका छन् । यसैगरी उनीहरुले असुरक्षित क्वारेन्टिन बन्द गर, स्वास्थ्य उपचार नागरिकको अधिकार हो, हेलो सरकार सुन्दैन लगायतका नारा अङ्कित प्लेकार्डसहित शान्तिपूर्ण प्रदर्शन तथा धर्ना कार्यक्रम गर्नै आएका छन् । उनीहरुले विरोध मात्र पनि गरेका छैनन् । सरकारले नयाँ नक्सा सहित संविधान संशोधन कार्य अघि बढाएकोमा धन्यवाद पनि दिएका छन् ।

३. सरकारले भने निषेधित क्षेत्र तोडिएको, लकडाउन उल्लंघन गरिएको, राजनीतिकरण भएको आदि आरोप लगाउँदै प्रदर्शन माथि अवरोध गर्दै आएको छ । कसरी युवाहरु जुटे र प्रदर्शन गरे यो कहाँबाट सञ्चालित छ भन्दै पत्ता लगाउन गुप्तचरहरु खटिए त्यसको जरो फेला पार्न नसकेको चर्चा छ ।

४. स्वतस्फूर्त रुपमा सहभागी र प्रदर्शन भएको यो कार्यक्रमको प्रचारप्रसार सामाजिक सञ्जालबाटै भएको पाइन्छ । सामाजिक आक्रोश समेटेर युवाहरुले नै आवाज उठाए र उनीहरु जुटेको देखिन्छ । अहिलेसम्म उनीहरुले देखिएको प्रदर्शनलाई अन्यथा मान्न सकिन्न । प्रदर्शन भद्ररुपमा हुनुपर्छ भन्ने आम धाराणा छ ।

५. कोरोना नियन्त्रणमा सरकारले प्रभावकारी कदम चाल्न र आफ्ना काम कारवाही पारदर्शी बनाउन दिएको सुझावलाई ग्रहण गर्नैपर्छ । जनताका आवाजलाई अन्यथा लिनु हुदैन । विरोध सुन्न नसक्ने सरकार जनताको सरकार पनि ठहर्दैन ।