प्रधानमन्त्री केपी शर्मा ओलीलाई प्रतिगामी भनेर सबैभन्दा बढी र चर्को गरी आलोचना गर्ने माओवादी केन्द्रका अध्यक्ष पुष्पकमल दाहाल प्रचण्ड र संसदमा प्रमुख प्रतिपक्षी दल नेपाली कांग्रेसका सभापति शेरबहादुर देउवाबीच फेरि लामो कुराकानी भएको समाचार बाहिरिएको छ । ती २ नेताले प्रधानमन्त्री ओलीको विकल्पका रुपमा नयाँ सरकार गठन गर्ने विषयमा विचार विमर्श गरेको बताइएको छ । अध्यक्ष दाहालले सुरुदेखि नै देउवालाई प्रधानमन्त्री बन्न प्रस्ताव गरेका छन् । सामान्य बेलामा प्रधानमन्त्री बन्न उतसहित हुने देउवा यस पटक अचम्म गरी धैर्यधारण गरेर बसेका छन् । वैकल्पिक सरकार गठनमा उनले त्यति चासो राखेका देखिँदैनन् ।

माओवादी केन्द्रले यो सरकारलाई दिएको समर्थन अझसम्म पनि फिर्ता नगरेकोमा धेरैले आश्चर्य प्रकट गरेका छन् । देउवाले पनि यो प्रश्न गरेका छन् । प्रचण्ड नेपाली राजनीतिमा फुट्न पनि सक्ने र जुट्न पनि सक्ने नेता हुन् । उनले कहिलेकाही २/३ दाउमा एकसाथ खेल्छन् भन्ने पनि गरिन्छ । देउवाले त्यो कुरा आफैले भोगेका थिए । २०७४ सालमा देउवा प्रधानमन्त्री भएका बेला माओवादी पनि सरकारमा थियो । २ नेताले स्थनीय चुनावमा केही सिटमा तालमेल गर्ने निर्णय गरे । एउटै सरकारमा भएकोले आमचुनावमा पनि देउवा २ पार्टीको तालमेल गर्न चाहन्थे । तर प्रचण्डले रातारात माओवादी र एमालेको चुनावी गठबन्धन गरेपछि देउवा आश्चर्य चकित भएका थिए । त्यसैबेला उनले सबै माओवादी मन्त्रीहरुको विभाग खोसेर बिना विभागीय मन्त्री बनाएका थिए । तैपनि ती मन्त्रीहरुले राजीनामा गरेका थिएनन् ।

अहिले प्रधानमन्त्री ओलीलाई दिएको समर्थन फिर्ता नगरेकोमा पनि केही रहस्य छ कि भन्ने पनि गरिएको छ । प्रचण्ड नेकपा विघटनको सम्बन्धमा पुनरावलोकनका लागि सर्वोच्चमा गएको अवस्था पनि छ । उता जसपाका नेताले जसरी सरकारसँग वार्ता गरिररहेका छन् । त्यसले पनि देउवालाई सक्रिय हुनबाट रोकेको देखिन्छ । जसपाका नेता महन्थ ठाकुुरले खुलेरै प्रधानमन्त्री ओलीको प्रशंसा गर्न थालेका छन् । सरकार र जसपाका नेताबीच भएको वार्ताको परिणाम नआएसम्म स्थिति प्रष्ट हुने छैन । वैकल्पिक सरकार गठनका लागि जसपाको भूमिका महत्वपूर्ण हुने भएकोले नेताहरुको भेटघाट र वार्तालापले खास परिणाम ल्याउने अवस्था छैन ।