गण्डकी प्रदेश सरकारले आगामी आर्थिक वर्षको नीति तथा कार्यक्रम सार्वजनिक गरेको छ । उक्त नीति तथा कार्यक्रम गण्डकी प्रदेश प्रमुख पृथ्वीमान गुरुङले प्रदेश सभामा वाचन गरी सार्वजनिक गरेका हुन् । प्रदेश सभाको बजेट अधिवेशनमा बजेटभन्दा पहिले सरकारले आफ्नो नीति तथा कार्यक्रम सार्वजनिक गर्ने परम्परा छ । त्यही परम्पराको निर्वाह गर्ने सन्दर्भमा प्रदेश प्रमख गुरुङले नीति तथा कार्यक्रम प्रस्तुत गरेका हुन् । २८६ बुँदामा उल्लेख गरिएको यो नीति तथा कार्यक्रम कृषि, स्वास्थ्य र पर्यटनलाई महत्व दिइएको छ । संसद्को चुनावको पूर्व सन्ध्यामा आएको बजेट भएकोले यो बजेटलाई चुनाव केन्द्रित र वितरणमुखी बजेट भनिएको छ ।

नीति तथा कार्यक्रममा केही नौलो कार्यक्रम ल्याउन खोजेको देखिन्छ । खास गरेर यसले स्वास्थ्य क्षेत्रमा आफ्नो दृष्टि फराकिलो पारी हेर्न खोजेको छ । प्रदेश सरकारले पोखरा स्वास्थ्य विज्ञान प्रतिष्ठानसँगको सहकार्यमा ५० शैयाको मिर्गौला प्रत्यारोपण अस्पताल स्थापना गर्ने उल्लेख छ । अहिले पोखराका अस्पतालहरुमा डायलासिस गर्ने गरिएको छ । मिर्गौला प्रत्यारोपण गर्ने गरिएमा त्यो पोखरेलीहरुको एक वरदान नै हुनेछ । कार्यक्रममा डायलासिस सेवा गोरखा लमजुङ र मध्यविन्दु जिल्ला अस्पतालमा विस्तार गर्ने बताइएको छ । नीति तथा कार्यक्रममा प्रदेशका सबै नागरिकले कोभिडविरुद्धको पूर्ण खोप लगाइसकिएको र १९ प्रतिशतले बुस्टर डोजसमेत लगाएको जानकारी गराइएको छ । एउटा उल्लेखनीय कुरा के छ भने कृषि क्षेत्रमा महिलालाई संलग्न ‘महिलाको जिम्मेवारी कृषिको रोजगारी’ कार्यक्रम ल्याएर ३ वर्षभित्र गण्डकीलाई खाद्यान्नमा आत्मनिर्भर बनाउने उल्लेख गरिएको छ ।

पर्यटन क्षेत्रमा विकासका लागि पनि केही कार्यक्रम ल्याउने संकल्प गरेको छ । नीति तथा कार्यक्रममा ‘हनिमुन टुरिजम’ को अवधारणालाई महत्वका साथ अघि सारिएको छ । सरकारले प्रदेशका केही रमणीय स्थलहरुलाई आकर्षक हनिमुन गन्तव्यको रुपमा प्रवद्र्धन गर्ने उल्लेख छ । पर्यटनको विकासका लागि महाभारत पदमार्ग निर्माण र गण्डकी ट्रेल निर्माण गर्ने नयाँ कार्यक्रम ल्याउने उल्लेख पनि कार्यक्रम छ । नीति तथा कार्यक्रममा दलित बस्तीमा भौतिक र सामाजिक सुधार कार्यक्रममार्फत् नमूना आदर्श बस्ती निर्माण गर्ने कुरा पनि लेखिएको छ । कोभिडबाट मृत्यु भएका आमाका बालबालिकालाई शिक्षामा पहुँचको सुनिश्चितता गर्न कोभिड छात्रवृत्ति सञ्चालन गर्ने प्रतिबद्धता पनि सरकारको नीति तथा कार्यक्रममा उल्लेख छ । यस्तो नीति तथा कार्यक्रमलाई नेताहरुले आ–आफ्नै किसिमले हेर्छन् र आ–आफ्नै किसिमले टीका टिप्पणी गर्दछन् । जसलाई स्वाभाविक भनिन्छ । यो कार्यक्रम वितरणमुखी छ, यो निश्चय नै हो । तर यसको कार्यान्वयन गरिएमा यो परिणाममुखी पनि हुन सक्छ । त्यसकारण हामी सरकारलाई यसको कार्यान्वयन पक्षमा ध्यान केन्द्रित गर्नुपर्नेमा जोड दिन चाहन्छौं ।