सामान्यतया बजेट प्रस्तुत गरेको भोलिपल्टदेखि त्यसमाथि छलफल चलाउने गरिन्छ । तर गण्डकी प्रदेश सरकारले आगामी आवको लागि प्रस्तुत गरेको बजेटमाथि ३ साता बित्दासमेत छलफल चलाउन सकेको छैन । मन्त्रालय भागबण्डा किचलोमा मुख्यमन्त्री कृष्णचन्द्र नेपाली पोखरेल नेतृत्वको सरकार अल्झिँदा न बजेटमाथि छलफल नै चलेको छ, न त रातो किताब आएको छ । बिनाविभागीय मन्त्रीहरु कामविहीन हुँदा अहिले सम्बन्धित निर्वाचत क्षेत्रमा केन्द्रित हुन थालेका छन् । पृथ्वीसुब्बा गुरुङ नेतृत्वको सरकारमा २ पटक मन्त्री बनेका स्वतन्त्र सांसद राजीव गुरुङ (दीपक मनाङे) अहिले कांग्रेसका पोखरेल नेतृत्वको सरकारमा बिनाविभागीय मन्त्री हुन् । उनले नियुक्तिको यतिका समय बित्दा पनि कामको जिम्मा पाएका छैनन् । त्यसैले उनी मनाङ, लमजुङका जिल्लाका बाढीपहिरो पीडितको राहत खोज्न केन्द्र धाउन थालेका छन् । केही दिनअघि मनाङ पुगेर फर्किएका उनी फेरि लमजुङ गएका छन् । त्यस्तै जनता समाजवादी पार्टी (जसपा) का संसदीय दलका नेता हरिशरण आचार्य पनि बिनाविभागीय मन्त्रीमै सीमित छन् । उनी ३ दिनदेखि आफ्नो निर्वाचत क्षेत्रमा केन्द्रित रहेको बताउँछन् ।
गत जेठ २९ मा पोखरेललाई प्रदेश प्रमुख सीताकुमारी पौडेलले संविधानको धारा १६८ (५) बमोजिम मुख्यमन्त्री नियुक्ति गरेकी थिइन् । नियुक्तिको दोस्रो दिन सरकारले आगामी आवको नीति तथा कार्यक्रम र तेस्रो दिन असार १ मा बजेट प्रस्तुत गरेको थियो । नियुक्तिकै दिन पोखरेलले पाँच सदस्यीय मन्त्रिमण्डल बिस्तार गर्दै शपथ खाएका थिए । नियुक्तिको ३० दिनभित्र संसदमा विश्वासको मत प्राप्त गर्नुपर्ने संवैधानिक व्यवस्था भएकोमा उनले सत्ता जोगाउन सत्ता साझेदार दललाई मन्त्रालयको आश्वासन दिँदै हतार हतारमा असार ४ मा विश्वासको मत लिए । उनलाई कांग्रेससहित माओवादी केन्द्र, राष्ट्रिय जनमोर्चा नेपाल, जनता समाजवादी पार्टी र स्वतन्त्रका राजीव गुरुङले साथ दिँदै ३१ को बहुमत जुटाइदिएका थिए । त्यसबेला कांग्रेसबाट मन्त्री नियुक्त कुमार खड्काले शिक्षा, संस्कृति, विज्ञान प्रविधि तथा सामाजिक विकास मन्त्रालयको जिम्मा पाउँदा माओवादी केन्द्रकी मधुमाया अधिकारी गुरुङलाई स्वास्थ्य तथा जनसंख्या मन्त्रालय सुम्पिएको छ । बाँकी २ मन्त्री आचार्य र गुरुङ बिनाविभागीयमै सीमित छन् । ११ मन्त्रालय रहेको गण्डकीमा पूर्व सहमतिबमोजिम मन्त्रालयको भागबण्डासहित जिम्मेवारी टुंगाइएको छैन । संसदमा सभामुखसहित १२ सिट रहेको माओवादी केन्द्रबाट मधुमाया अधिकारी गुरुङमात्र मन्त्री बनेकी छन् । माओवादीले सरकारमा आफू दोस्रो ठूलो दल हैसियतले अर्थ वा भौतिक पूर्वाधार मन्त्रालय माग गरेको छ भने राजीव गुरुङले त्यस्तै मालदार मन्त्रालयको अडानमा छन् । तर कांग्रेसले सरकार नेतृत्वको हैसियतले एउटा आफूसँग राख्न चाहन्छ । त्यसैले होला आचार्यलाई ऊर्जा तथा सिँचाइ र गुरुङलाई युवा तथा खेलकुद मन्त्रालयको जिम्मा तोकिए पनि जिम्मेवारी लिन नमान्दा किचलो कायमै छ ।
सरकारले ३ सातासम्म समेत रातो किताब ल्याउन नसक्नुन र बजेटमाथि संसदमा छलफल चलाउन नसक्नु विडम्बना हो । यसले अस्थिरता उत्पन्न हुने तथा सुशासन कायम राख्न र विकास निर्माणमा बाधा उत्पन्न हुन्छ । त्यसतर्फ सत्ताको खेलबाडमा नअल्झिकन समस्या समाधानतर्फ लाग्न सरकारले बेलैमा सोच्न आवश्यक छ ।
Related News
सम्बन्धित समाचार
आन्दोलनलाई उत्तेजक नबनाऊ
नेपालको बिजुली भारतले किन्ने सम्झौता
अग्रज पत्रकार पोखरेलको निधन
प्रमको सम्बोधनः कामभन्दा आश्वासन धेरै
त्रिविमा राजनीतिक भागबण्डा अन्त्य गर्ने उद्घोष
hero news full width
मुख्य समाचार
त्रासैत्रासमा तंग्रिदै कागबेनी
मनिपालमा अत्याधुनिक एमआरआई मेसिन
वैशाख १३, २०८११३ वटा मुद्दा चलेका एक युवा पोखराबाट अटोमेटिक पेस्तोलसहित पक्राउ
वैशाख १३, २०८१कतारी अमिर स्वेदश फिर्ता : पोखरा–कतार उडान माग
वैशाख १३, २०८१कास्कीमा एसइई उत्तरपुस्तिका परीक्षण रोकियो
वैशाख १२, २०८१गण्डकीमा डायलाइसिसका लागि अब पालो कुर्न नपर्ने
वैशाख १२, २०८१