धेरै धनजनको क्षति गरेर केही समय सुस्ताएर रहेको कोरोना विस्तारै बढ्न थालेको छ । कोरोनाको परीक्षण गर्नेहरुको संख्या बढेअनुसार अस्पतालमा कोरोनाको बिरामीका लागि खाली राखिएको बेडहरुमा बिरामी देखिन थालेको छ । केही हप्ता पहिले भारतमा यो संक्रमण बढेको रिपोर्ट थियो भने अहिले नेपालमा नै देखिन थालेको छ । विशेषज्ञहरुले ५ प्रतिशतभन्दा बढीमा कोरोना देखिएको जानकारी दिएको छ । ५ प्रतिशतभन्दा बढीमा संक्रमण देखिएकोले विशेषज्ञहरुले यसलाई चौंथो भेरियन्ट भन्ने गरेका छन् र यसको नाम बिए ५ भरियन्ट भन्ने गरेका छन् । तिनीहरुले यो भेरियन्ट छिटो फैलने भएकाले यसबाट सजग र सतर्क हुनुपर्नेमा जोड दिएका छन् । तिनीहरुले जनाए अनुसार यो चौंथो भेरियन्टबाट २ जना बिरामीको ज्यानसमेत गएको छ ।

ती २ जना बिरामी जसको असामयिक निधन भयो, तिनीहरु दुवै जनाले खोप नलिएको पाइएको छ । सरकारले चैत महिनासम्म सबै नेपालीलाई खोप दिने प्रतिबद्धता जनाए तापनि अझै धेरै नेपालीहरु खोपबाट बञ्चित छन् । खोप कार्यक्रम तुरुन्त अभियानको रुपमा फेरि सञ्चालन गर्नुपर्नेमा यसले दबाब दिएको छ । यो दबाबलाई सरकारले गम्भीरतापूर्वक लिनु पर्दछ । त्यसको साथै सीमामा भारतबाट आउनेहरुको स्वास्थ्य चेक जाँच गर्नुपर्दछ र कोरोनाबाट संक्रमित देखिएमा त्यसलाई पहिले झैं क्वारेन्टिनमा राख्ने व्यवस्था गर्नुपर्दछ । हाम्रो एउटा नराम्रो बानी के छ भने एकपटक सुस्ताएपछि लामैसमय सुस्ताएर बस्ने र अझ त्यस्तै परे भुसुक्कै निदाइदिने । चौंथो भेरियन्ट सुरु भइसकेकाले त्यसरी सुस्ताउने बेला यो होइन, स्थितिको गम्भीरतालाई बुझेर सरकारले छिटो आफ्ना मातहातका सबै शाखा प्रशाखाहरुलाई सक्रिय पार्नुपर्दछ ।

कोरोना खराब र खतरनाक सरुवा रोग भएकोले तथा तलमाथि केही मिलेन भने नागरिकको ज्यानसमेत जाने भएकोले यसमा नागरिकहरु आफैं सजग र सतर्क हुनु पर्दछ । सरकार आएर खोप लगाइदेला भन्नुभन्दा आफैंले खोप केन्द्रमा गएर खोप लगाउनु पर्दछ । पहिले लगाइसकेकाले बुस्टर डोज लगाउनु पर्दछ । सरकारले विद्यालयका छात्रछात्रालाई खोप सञ्चालन गरेको छ । यो खोप कार्यक्रमलाई पनि गति थपेर सञ्चालन गर्नुपर्दछ । हामीले कोरोनाको तेस्रो भेरियन्टसम्म भोगीसकेका छौं । हामीमध्ये धेरैलाई मास्क लगाउनेदेखि जनस्वास्थ्यका नियमहरु थाहा छ । थाहा भएर पनि कोरोनाको प्रभाव कम भएकोले हामी ती नियमहरुको पालना गरेका छैनौं । तर अब कोरोनाको चौंथो भेरियन्ट बढेकोले यसलाई हामीले खतराको घन्टी बजेको सम्झेर जनस्वास्थ्यका सबै नियमहरु आजैदेखि पालना गर्ने गरौं, यही हाम्रो आग्रह छ ।